Алматы қаласы, Бостандық ауданы,
№70 жалпы білім беретін мектебі
Жаңа оқу жылы қарсаңында Алматы қаласы Бостандық ауданындағы №70 жалпы білім беретін мектепте «Мектепке жол» республикалық қайырымдылық акциясы ұйымдастырылды. Игі бастама мектеп меңгерушісі Удуримова Шара Сабырқызының басшылығымен жүзеге асып, әлеуметтік қолдауды қажет ететін оқушыға жаңа оқу жылына дайындалуына жан-жақты көмек көрсетілді.
Акцияның басты мақсаты – әлеуметтік жағдайы төмен және қолдауды қажет ететін отбасылардың балаларына қолдау көрсетіп, олардың мектепке қажетті құрал-жабдықтармен толық қамтамасыз етілуіне жағдай жасау.
Іс-шара барысында ұстаздар мен жанашыр азаматтардың қолдауымен бір оқушыға мектеп формасы, аяқкиім, сөмке және оқу құралдары табысталды. Бұл көмек баланың жаңа оқу жылын көтеріңкі көңіл күймен бастап, білім алуға деген ынтасын арттыруға ықпал етті.
«Мектепке жол» акциясы – жай ғана материалдық көмек көрсету емес, әр балаға көңіл бөліп, оның болашағына сенім сыйлайтын ізгі бастама. Осындай қайырымды істер өскелең ұрпаққа мейірімділік, қамқорлық және өзара көмек құндылықтарын дәріптейді.
Көмек алған ата-ана мектеп басшылығына, ұстаздарға және демеушілерге шынайы алғысын білдірді. Ал оқушы жаңа оқу жылында жақсы білім алып, өзіне көрсетілген сенімді ақтауға уәде берді.
Балаға жасалған әрбір қамқорлық – оның болашағына жасалған маңызды қадам. Бір баланың мектепке қуанышпен баруына себеп болу – барша қоғам үшін үлкен сауапты іс.
№70 мектеп ұжымы «Мектепке жол» республикалық акциясына атсалысқан барлық азаматтарға алғыс білдіреді. Жақсылық пен жанашырлыққа негізделген игі бастамалар алдағы уақытта да жалғасын таба берсін!