«Көжекке көмектесейік»

Агманова Бактигул Ахметжановна
Астана қаласы
«Арт-терапия басым бағыттағы
 №45 «Самұрық» балабақшасы»   МКҚК
Кіші «Гәкку» тобының тәрбиешісі

Ұйымдастырылған іс — әрекет:  Сенсорика.

Тақырыбы: «Көжекке көмектесейік».

Мақсаты: Балаларды 3 түрлі пішінмен (дөңгелек, үшбұрыш, шаршы), 4 әртүрлі түспен  (қызыл, жасыл, көк, сары)  және 2 әртүрлі көлемдегі (үлкен және кішкентай) заттарды таңдауды жүзеге асыра отырып пішініне және көлеміне қарай топтастыруға үйрету. Ұсақ қол моторикасын дамыту. Бір – біріне  деген достық қарым – қатынасқа, қамқорлыққа, ұйымшылдыққа,  ептілікке, шапшаңдыққа тәрбиелеу.

Көрнекі құралдар: түрлі – түсті пішіндер, шарлар, текшелер, шеңбер.

Тәрбиеші:

Балалар, қараңдаршы бүгінгі күн қандай тамаша болып тұр. Саяхатқа барғыларың келеді ме?

Балалар: ия, барғымыз келеді.

Тәрбиеші: Саяхатқа орманға барып қайтайық. Ол жаққа бару үшін бізге не керек. Балалар: Пойыз.

Тәрбиеші: Балалар жүріңдер пойызға отырайық. Қане, балалар бір – бірімізге ақ көңілмен ақ жол тілейік.

Ағаш түбінде көжек көңілсіз отырады.

Тәрбиеші: Көжек саған не болды, неге көңілсізсің?

Көжек: менімен ойнайтын ешкім жоқ, орман іші тып – тыныш. Ал, менің ойнағым келіп тұр. Қандай сүйкімді балаларсыңдар. Сендер қайдан келдіңдер, қайда бара жатырсыңдар?

Тәрбиеші: Көжек сен мұңайма, біз саяхаттап жүрміз. Бізбен бірге саяхаттағың келеді ме?

Көжек қуанып кетеді.

Көжек:  Ия, менің де саяхаттағым келеді. Менің де сендермен бірге барғым келеді.

Тәрбиеші: Онда, балалар, көжекті бірге ертіп алайық.

Балалар, біздің жолымызда түрлі – түсті, әртүрлі өлшемде шарлар жатыр екен. Ойын арқылы осы  кедергіні жоюымыз керек.

1 ойын:

Өлшемдер.

Екі шеңберге үлкен және кішкентай шарларды лақтыру.

Тәрбиеші: Балалар, қандай тамаша біз кедергіден өттік.

Балалар біздің жолымызды текшелер бөгет жасап тұр екен. Бөгеттен өту үшін текшелерді түсіне қарай орнына қоюымыз керек.

2 ойын:

Түстер.

4 түрлі түсті ажырату ойыны. (қызыл, жасыл, сары, көк)

Тәрбиеші: Балалар, қандай тамаша бұл  кедергіден де жақсы өттік.

Балалар қолымыз тоңды ма?

Балалар:  Ия.

Тәрбиеші: Онда қолымызды жылытайық. Қолғаптарымызды киіп алайық. Қолғаптарымыз қайда? Жыртылып, шашылып қалыпты ғой. Қолғаптарымызды пішіндер арқылы  жамап алайық.

3 ойын:

Пішіндер.

Домалақ, шаршы, үшбұрыш пішіндерден тесік қолғапты жамау.

Тәрбиеші: Көжек, саған біздің саяхатымыз, ойындарымыз ұнады ма?

Көжек: Сендермен ойнаған ойындар өте қызықты екен. Балалар, сендерге көп – көп рахмет. Көңілім көтеріліп қалды.

Тәрбиеші: Көжек, кеш болып қалды, біз балабақшамызға қайтайық. Қош, сау бол!

 Көжек: Сау болыңдар!