Оралдық баскетболшылар жақсы нәтиже көрсетті

Орал қаласындағы №1 жалпы орта білім беретін мектебінің баскетболшы қыздар құрамасы республикалық «Алтын доп» жарысынан жүлдемен оралды.

Қалалық білім беру бөлімі баспасөз қызметінің мәліметінше, жерлестеріміз ұлттық мектеп лигасы аясында 5-6 сынып оқушылары арасындағы республикалық баскетболдан «Алтын доп» жарысында жүлделі  ІІ орынды жеңіп алды. Ұлттық мектеп лигасы аясындағы ойындар 8-18 сәуір аралығында Павлодар қаласында ұйымдастырылды. Оған республикамыздың  әр өңірінен  8 команда қатысқан. Батыс Қазақстанның намысын қорғаған оралдық қыздар құрамасы бұл жарыста жақсы нәтиже көрсете білді. Финалдық ойында жергілікті  павлодарлық командаға ғана есе жіберіп, жүлделі  ІІ орынға тұрақтаған.

Команданың  жаттықтырушылары – Е.Бералиев пен З.Әбдрахманова. Айтулы додада үздіктер қатарынан көрінген командадан жаттықтырушылары мен ата-аналары үлкен үміт күтеді. Жас баскетболшы қыздардың әлі бағындырар белестері алда екеніне сенеді.

Ләззат САЛАУАТҚЫЗЫ
«BILIM AINASY»
Орал