Мақал сөздің азығы, жұмбақ — сөздің қазығы

Алматы қаласы білім басқармасының
«№12 бөбекжай-балабақшасы» Әдіскері
Әлібек Жауқасын Әлібекқызы

Алматы қаласы білім басқармасының «№12 бөбекжай-балабақшасы» КМҚК “Жарқын болашақ” жобасы аясында  ата-аналар мен тәрбиеленушілердің қатысуымен «Мақал сөздің азығы, жұмбақ — сөздің қазығы» тақырыбында сайыс өткізді. Сайысқа мектепалды   «Жұлдыз» және «Қарлығаш» топтарының ата-аналары балаларымен қатысты. Бұл сайыстың мақсаты:  тілді ұлттық мұра ретінде сезінуге, тіл мәдениетін сақтай білуге үйрету, мақал – мәтелдерді орынды қолдану дағдыларын қалыптастыру. Сайыс:

• Смайлик арқылы көрсетілген мақал-мәтелдерді табу;
• «Кім жүйрік?» (жұмбақ жасырылады , жұмбақтың жауабына мақал айту);
• «Ойлы болсаң, озып көр» (мақалдың жалғасын табу)
• Тұрақты сөз тіркестері (мағынасын табу)  кезеңдері бойынша жүргізілді. Барлық кезеңдер бойынша қатысушылар белсенділік танытып, өздерінің  күнделікті өмірінде, өзара қарым-қатынасында мақал-мәтелдерді, көнеден келе жатқан тұрақты сөз тіркестерін қолданатынын көрсете білді. Қатысушылар үшін ең қызықты да, қиын кезең смайликтер арқылы жасырынған мақал-мәтелдерді табу болды. Ата-аналарымыз барлық кезеңдер бойынша  өздерінің ұшқырлықтарын танытып, сүрінбей өте білді. Сайыс соңында балабақша меңгерушісі Нурманбетова Гулжамал Дакесовна сөз сөйлеп, топтарды жинаған ұпай сандарына байланысты марапаттап, сайысқа қатысушы ата-аналар мен тәрбиеленушілерге алғысын білдірді. Ата-аналар да өз тарапынан ұйымдастырушыларға алғыс айтты.

Ана тілім – бәрін сөйлер шежірем,

Тілсіз нені білдіре алам, не білем?!

Тілім барда ғана мынау ғаламның

Кілтін табар саналысы сезінем.

О,адамдар, қадіріне жетіңдер,

Ана тілің- анаң, сыйлап оны өтіңдер.

«Анамыздың ақ сүтімен бойымызға дарыған тілімізді ұмыту- бүкіл ата- бабаларымыздың тарихын ұмыту» — деп Бауыржан Момышұлы айтқандай, ана тілімізді құрметтеп, сүйе білейік.