Білім айнасы газеті Республикалық газет 
Еріктілерді қолдау орталығы ашылды
Үлкен жүректі, ізгі ниетті волонтерлар қауымына бағыт-бағдар беруді, қолдау көрсетуді мақсат тұтқан «Қазақстан волонтерлары лигасы» қоғамдық бірлестігінің Батыс Қазақстанда филиалы ашылып, жергілікті еріктілердің жұмысын үйлестіруге кірісті. Филиалдың Оралдағы орталығының ашылу салтанатына қала әкімі Абат Шыныбеков қатысып, сәттілік тіледі.
Шаһар басшысы аталған орталықтың белсенді, еліне жанашыр азаматтардың басын біріктірер ортаға айналарына сенім білдірді. – Ақ Жайықтың жастары Мемлекет басшысының бастамаларын әр кез қолдайды. Әлемді жайлаған пандемия кезінде оралдық еріктілер де қатардан табылып, жерлестеріне барынша қолдау көрсетті. Біздің бүгінгі мақсатымыз – жүрек жылуы мен мейірімділіктерін игілікті мақсатқа жұмсауға ниет еткен азаматтардың жұмысын бір арнаға бағыттау. Орал қаласы – жаңа бастамалардың қаласы, – деген Абат Абайұлы оралдық жас буынның игілікті істеріне сәттілік тіледі.
Айта кетсек, еріктілердің жұмысын үйлестіруді мақсат тұтқан орталық «Ашық жүрек» жобасын іске асыру» гранты шеңберінде ашылды. Оқушылар сарайында орналасқан «Бастау» коворкинг орталығында өз жұмысын бастаған «Қазақстан волонтерлары лигасы» облыстық филиалының жетекшісі Алтынбек Бисенов аталмыш қоғамдық бірлестік 2014 жылы Алматыда құрылғанын атап өтті.
– Біздің волонтерларымыз «Универсиада» ойындары, «Экспо» көрмесі сынды ірі іс-шараларға атсалысып, тәжірибе жинақтады. Жастар жылында бастау алған «Ашық жүрек» жобасы аясында өз тәжірибемізді жүзеге асырып, өңірлерде орталықтар ашып, еріктілер қозғалысын дамытудамыз. Бұл ретте сегіз бағыт бойынша жұмыстанып, әрбір еріктіге өз жобасын іске асыруға қолдау көрсетеміз, – деді ол. Сондай-ақ «Ашық жүрек» жобасы аясында еріктілерге шағын гранттар беру мүмкіндігі қарастырылғанын айтты.
Биыл волонтерлар қатарына қосылған жерлесіміз Әмина Мақсотова алда атқарылар жұмыстар өте көп екенін жеткізді. Оралдық волонтерлар өздеріне қолдау көрсететін мұндай ұйымның ашылғанына қуанышты. Нәтижесінде игілігі мол істерінің жандана түсеріне сенім мол.
Ләззат САЛАУАТҚЫЗЫ,
«BILIM AINASY», БҚО
