Менің білім саласына қосқан үлесім

Кульджанова Ғалия Батқоллақызы
Астана қаласы әкімдігі
№61 «Шолпан» балабақшасының  әдіскері

Менің білім саласына қосқан үлесім

 Мамандық таңдау – өте маңызды қадам. Адам таңдаған мамандығы бойынша өмір бойы қызмет етеді. Мамандық – әрбір адамның болашағы, сондай – ақ шаруашылық көзі болып табылатын сүйікті іс. Адам өзі таңдаған мамандығына құрметпен қарауы тиіс. Мамандық таңдау үлкен жауапкершілікті қажет етеді.

Ұстаз мамандығын таңдаған адам халық үшін қызмет  атқарады. Шәкірттерін білім нәрімен сусындатып, жақсы қасиеттерді бойына дарытып, адамгершілік рухта тәлім – тәрбие беру ұстаздың  басты мақсаты. Замануи талаптарға келер болсақ, жаңаша жұмыс істейтін ұстаз — ол кәсіби қалыптасқан, педагогикалық шеберлігі ұшталған, рухани дүниесі бай, жаңалыққа, шығармашылыққа құмар тұлға.

Менің сүйікті мамандығым – балабақша тәрбиешісі. Міне, балабақшада еңбек етіп келе жатқаныма 40 жыл…

Ақмола өңірінің Ерейментау ауданы, Бестоғай ауылында дүниеге келіп, мектепті туған ауылымда бітірдім. Мектептен кейін Целиноград қаласының педагогикалық училищесінен дәріс алып, ауылдағы балабақшада тәрбиеші болып еңбек жолымды бастадым.  Еңбегім бағаланып, ел құрметіне бөлендім. Ауылдағы «Балдәурен» балабақшасының меңгерушісі қызметіне тағайындалып, қаншама баланы мектепке дайындап шығардық.
Кеңес үкіметі тараған уақытта Астана қаласына  көшіп келіп, Астана қаласы әкімдігінің  №60 «Арай»  балабақшасында  еңбек жолымды  жалғастырдым. Үнемі ізденісте жүріп, білімімді  көтеру мақсатында курстарға қатысуды тоқтатқан емеспін.  Әріптестерімнің  сабақтарына қатысып, тәжірибе алмастым. Осы күнге дейін үйренерім көп екенін білемін…

Тәжірибе жинақтауыма көп үлес қосқан, жол көрсете білген белгілі ұстаз балабақша жанашыры  педагогика ғылымдарының кандидаты, доцент Жұмабекова Фатима Ниязбекова.  Ақыл кеңесімен бөлісе білетін ұстазбен танысқаныма қуаныштымын. Ол кісіге айтар алғысым шексіз.

Бүгінде Астана қаласы әкімдігінің  №61 «Шолпан» балабақшасында әдіскер, жоғарғы санаттағы тәрбиешімін. Еңбек жолымда қаншама «Алғыс хат», мадақтамалармен марапатталдым. Әріптестер арасында қадірлі, сыйлайтын ұстазға айналдым.
Астана қаласындағы №92 «Жауқазын»,  №80 «Ботақан», № 93 «Айгөлек» балабақшаларының ашылуына, ұжым болып қалыптасуына өз үлесімді қосқан әдіскермін. Осы жылдар аралығында  қаншама әдіскерлерді дайындап, өз жолдарын бастауына септігімді тигіздім. Шәкірттерімнің өзімнен озғаны ұстаздық еңбегімнің ақталғаны.  Шәкірттерімді мақтан тұтамын.

Жақсы тәрбиеші — бұл балаларды қасына жақын ұстайтын, жақсы көретін адам. Оларға өз білімін беріп, үйретіп, адамгершілік қасиеттерді бойына сіңіріп,тәрбиелейтін мамандық иесі. Жүсіпбек Аймауытов  былай деп жазды: «Дәрігер – адамның денесін сауықтыратын болса, тәрбиеші- адам ақылын, мінезін, жанын сауықтырады.»

Орыс халқының жазушысы Л.Н.Толстой былай деп жазды: «Болашаққа жарамды адамды тәрбиелеу үшін, оларды  тамаша жетілген азамат етіп тәрбиелеу қажет.Тек сонда ғана тәрбиеленуші өз ортасында өмір сүретін ұрпақтың лайықты мүшесі бола алады» Қоғам педагогтарға ерекше жауапкершілік жүктейді. Педагог жас ұрпаққа білімді ғана емес, рухани-адамгершілік тұрғысында тәрбиелейді. Мен өз мамандығыма үлкен жауапкершілікпен қараймын және соны педагогтардан  талап етемін.

Еңбек жолымда мені меңгерушілікке ұсынған кезде совхоз директоры Х.С.Хараджиев «Балабақшада жүрегі кристалдай таза адамдар ғана жұмыс істеу керек. Мен саған сенемін» деп еді. Сол сөз мәңгі есімде, менің кәсіби міндетім-мектепке дейінгі балалардың ақыл-ой ынтасын, логикалық ойлау қабілетін дамыту, адамгершілік қасиеттерін бойына сіңіріп, білімге деген қызығушылықтарын арттыру, жан-жақты дамыған жеке тұлға тәрбиелеп шығару.

Менің жақсы маман болып шығуыма тәлім- тәрбие берген – Целиноград қаласының педагогикалық училище ұстаздары. Оларды әрдайым еске алып, өзімнен кейінгі тәрбиешілерге айтып отырамын. Елімнің болашақ ұрпақтарын тәрбиелеуге өз үлесімді қосып келе жатқанымды мақтан тұтамын.