Білім айнасы газеті Республикалық газет «Ұстазды алтын діңгекке балар едім» — деп, ұлы ағартушы Ы.Алтынсарин айтқандай ұстаздық – тарихтағы ең ұлы істің бірі. Шындығында, мұғалім ісі сырттай қарапайым болғанымен, ұлағатты ұстаз мәртебесі кез келгеннің маңдайына бұйыра бермейтін бақ.
Қай заманда болсын, ұстаздарға құрмет жоғары болған. Бүгіннен немесе кешеден ғана ұлы мамандық иелеріне құрмет көрсетіліп келе жатқан жоқ, ықылым заманнан бері ұстаздықтың шоқтығы биік тұр.
⠀
«Тамшысымен тас тесетін бейне бір су тәрізді» жандарға ілтипат таныту – адамгершілігіңнің ілгері басуының бір қадамы. Өйткені, ұстазға құрмет көрсету – білімге құрмет көрсету.
15.02.2024 жылы Исатай Әбдікәрімов атындағы №168 орта мектебінде “Ұстаз- ұлы есім” атты Айтжанова Анипа Досхожақызын “Еске алу “ кеші болып өтті.
Анипа Досхожақызы 168 мектепте математика, информатика пәндерінен сабақ берген ұлғатты ұстаз еді. Рухани кеш — ұстазымыздың өмірбаянымен басталды. Өмірбаянды оқыған Мұхтархан Қарақаттың дауысы, ішкі күйі, сезімі жүрекке жетті.
Өмірінің 33 жылын ұстаздыққа арнаған асыл анамыздың білім саласындағы ізгі жолы көпке үлгі.
Еске алу кешінде ұстазымыздың білім жолындағы еңбектері мен жұбайы, ұл-қыздары жайлы түрлі естеліктер айтылды. Ұстазымыздың және өмірлік серігі болған жолдасының бауырлары, ұжымдастары естеліктер айтып, өткен өмірлерінен сыр шертті. Мектептің оқушыларынан сағыныштың лебін сездім.
Ұстазы жақсының — ұстамы жақсы !- деген сөз бекер болмаса керек. Біздің ауыл үшін мұндай “Еске алу” кеші тарихи оқиға болды. Атаулы кешті ұйымдастырған Муслимова Замира Сейдахметқызының еңбегі ерен.
⠀
Ұстазының ұстамды жолын ұлықтап, ұстазына деген құрметі жүрегімізге жылулық сыйлады.
Еске алу кеші — жабырқаған жүректің сырын ашып, ой түкпірін тереңнен қозғаған шара болды деп толық айта аламын.
⠀Ұстаз еңбегі – ұлы еңбек. Егер әр адамның жүрегінде ізгілік тамшысы мен бойында қарым-қабілеті болса, ол соны аша білген мұғалімнің еңбегі. Сол нұрды жеткіншектің бойына дарыту үшін мұғалім қаншама тер төкті десеңізші. Дүниеде адамды тәрбиелеп, азамат атандырғаннан артық абырой мен құрмет жоқ шығар, сірә?
⠀Иә, Анипа Досхожақызы осындай құрметке лайық ұстаз бола білді. Өлшеулі ғұмырында асыл жар, мейірімді ана, ұлағатты ұстаз бола білген аяулы жанды еске алудың өзі- ұстазға деген құрмет деп білемін.
Дайындаған: Қызылорда облысы, Жаңақорған ауданы, Қожакент ауылы И.Әбдікәрімов атындағы
№168 орта мектебінің география пәнінің мұғалімі: Бұрханова Назерке Мұқтарқызы
ҚАЗҰУ – МҮМКІНДІКТЕР МЕКЕНІ
Жарқын нұрымен жарқыраған жұлдыздай Қазақстанның төсінде студенттердің шабыт алып, өсіп-өркендеп жатқан ордасы,қара шаңырақ –Әл-Фараби атындағы Қазақ Ұлттық университеті (ҚазҰУ) 1934 жылы 15 қаңтарда құрылды. Университетте 20 мыңға жуық студент білім нәрімен сусындап, білікті мамандар қатарын толықтыруда. 10-нан аса факультеттен құралған университетте 3 мыңға жуық профессор-оқытушылар құрамы студенттерге білім беріп келеді. Бұл жай ғана оқу орны емес, бұл әрбір студент өзінің болашаққа қанат қатайтатын мүмкіндіктер мекені.
Мұнда әркім арманмен келіп, өнерімен, білімімен, өз күшіне сеніп кетеді. ҚазҰУ студенттерге білім әлеміне есігін айқара ашып, түрлі саладағы білім беру бағдарламаларының кең ауқымын ұсынады. Қандай жолды таңдағанына қарамастан — гуманитарлық және әлеуметтік ғылымдардан бастап жаратылыстану және техникалық мамандықтарға дейін әртүрлі білім салаларындағы білім беру бағдарламаларының кең таңдауын ұсынады. Бұл әр оқушының өз жолын тауып, оның қызығушылығы мен қабілетіне сай салада дамуына мүмкіндік береді.
ҚазҰУ студенттердің түрлі академиялық және ғылыми жобаларға қатысу арқылы өз қабілеттерін аша алатын орын. Ол тағылымдамадан өтуге, конференцияларға қатысуға, ғылыми мақалалар жариялауға және т.б. мүмкіндіктер береді. Бұл студенттерге алған білімдерін іс жүзінде қолдануға және өз саласында құнды тәжірибе алуға жол ашады.
ҚазҰУ – кәсіби мамандар ғана емес, көшбасшылар да қалыптасатын жер. Мұнда студенттерге студенттік клубтарға қатысу, іс-шаралар ұйымдастыру және қоғамдық жұмыстарға қатысу арқылы көшбасшылық қабілеттерін дамытуға мүмкіндіктер беріледі.Cтуденттердің қарым-қатынас дағдыларын дамытуға, топпен жұмыс істеуге және өз әрекеттеріне жауапкершілікті алуға үйренуге көмектеседі.
Бірақ ең бастысы – университет қабырғасында орнаған қолдау мен шабыт атмосферасы. Мұнда әрбір студент өз армандарының маңызды екенін, күш-жігерінің бағаланатынын, мүмкіндіктерінің шегі жоқ екенін сезінеді. ҚазҰУ –ол әркім өз орнын тауып, әркім өзінің биік жетістіктеріне шақыратын қауым.
Әл-Фараби атындағы Қазақ Ұлттық Университеті-мүмкіндіктері шексіз, армандар шындыққа айналатын, студенттер тек білім ғана емес, сонымен қатар армандары мен амбицияларын жүзеге асыра алатын болашақтың кілтін алатын орын.
Әл-Фараби атындағы ҚазҰУ
Есептеу ғылымдары және статистика кафедрасының
1-ші курс студенті: Шалқарбек Ұлмерей
Филология факультеті
Шет тілдер кафедрасының оқытушысы: Жубанова Кулаш Хорезмовна