Ұстаз-ұлы есім

Тәртіпқызы Маржан,
Алматы қаласы, Наурызбай ауданы
«№200 мектеп-гимназия КММ
қазақ тілі мен әдебиеті пәнінің мұғалімі

Маған жақсы мұғалім бәрінен де қымбат,
өйткені мұғалім – мектептің жүрегі.

Ыбырай Алтынсарин.

 Дүниедгі мамандық атаулының төресі — ұстаздық. Әсілі, мұғалім  барлық  мамандық   иесін  тәрбиелейтін,  оқытып  үйрететін  мейірімді абзал жандар.  «Мұғалім  мамандығы – барлық  мамандықтың  анасы»  демекші,         ұстаз алдынан тәрбие алмайтын жан жоқ. Ұстаз  берген  тәрбие  әрбір  жанның  өміріне  жол  сілтер  шамшырақ  секілді. Ғылым иесі ғалым да, ел қорғаған батыр да,тілінен бал тамғанн ақын да, тегеуріні темір балқытқан  жұмысшы да, егін салған диқан да,  мал бағып терін төккен  шопан да, көк  күмбезінен  әрі  өткен ғарышкер  де  бәрі-бәрі  ұстаздан  білім,  тәлім  алған. Сондықтан ұлағатты  ұстаздарға  бүкіл  адам баласы  құрметпен  бас  иеді.  «Ұстаз болу – өз уақытыңды аямау, өзгенің уақытын аялау», — деп француз ойшылы Жан Жак Руссо айтпақшы, ұстаздардың еңбегі ерен.  Осы арада әріптесім №200 мектеп-гимназиясының  ағылшын тілі пәнінің мұғалімі — Ишангалиева Айгуль Максотовнаның жетістігін айта кеткім келеді. «Қазақстан мұғалімі-2021» ұлттық премиясының ең үздік ондық қатарына еніп, «Әлем мұғалімі» байқауына қатысуға жолдама алды. Шараның негізгі ұйымдастырушысы әлеуметтік маңызға ие қоғамдық бастамаларды қолдайтын қордың жетекшісі –Әлия Назарбаева.  Бұл байқауды әлем Президенттері атақты бизнес өкілдері белсенді түрде қолдап, ұстаздар қауымын «Ерекше мәртебеге ие мамандық иелері» деп қолпаштап, демеу беріп отыр.  Осындай ұстаздан білім алған шәкірттердің келер болашағы жарқын деген үміттемін.  Шәкірт санасына білім нәрін сеуіп, ел болашағының өрендерін тәрбиелеп шығару — екінің бірінің қолынан келе де бермейді. Ұстаз болу – жүрек жылуын, мейірім шуағын, адамгершілік ұлылығын баланың бойына дарыту. Ұстаз болу – шәкіртке ата-анасындай болып тәрбие сыйлау. Ұстаз болу – жас ұрпақтың жарқын болашаққа барар жолын айқындап беру. Орыс ойшылы Анатолий Луначарский айтпақшы, «ұстаз – бұл жас ұрпақтың бойына ғасырлар бойы жинақталған барлық асылдарды сіңіруші, ал оларды соқыр сезімдерден, жамандықтардан және жұқпалы мерездерден аулақтатушы адам».
Ал қазақтан шыққан қоғам қайраткері, ағартушы-ғалым Ахмет Байтұрсынов «мұғалім – мектептің жаны» деп бағалаған. Осыдан-ақ, ұстаз деген – ұлы есім екенін талассыз аңғаруға болады. Себебі, ұстазға деген құрмет бәрінен биік тұрады. Қай заманда болсын, ұстаздарға құрмет жоғары болған. Бүгіннен немесе кешеден ғана ұлы мамандық иелеріне құрмет көрсетіліп келе жатқан жоқ, ықылым заманнан бері ұстаздықтың шоқтығы биік тұр.  «Адамның адамшылығы — жақсы ұстаздан» деп ұлы Абай айтқандай, мұғалім тәрбиесі мен өнегесі оқушының болашақ азығы. Жақсы ұстазға кезігіп, тәлім-тәрбие алған шәкірт өмір майданында мойымай күресіп, болашақ жолдарда бағытынан таймасы анық.
Ұрпақ болашағы, халқымыздың келешегі қазіргі ұстаздардың қолында. Тәуелсіз ел атанып, төбемізге ту тігіп, тіліміздің мәртебесі артып, әлемге атымызды танытып жатқан кезеңде ұлттың, елдің болашағы-жас ұрпақ тәрбиесіне де мықты көңіл бөлінуде. Осы егеменді, тәуелсіз Қазақстанда өркениетке бастар жолдың
бастауы мектеп десек, мектептің басты тұлғасы, жүрегі-мұғалім.
Жаһандану заманында ұлттық бәсекеге қабілетті болудың көрсеткіші – білім деңгейімен өлшенеді. Сондықтан, әлемдік білім кеңістігіне кірігіп, білім беру жүйесін халықаралық биікке көтеру кезек күттірмейтін өзекті мәселе. Бұл мәселені шешудің кілті — ұстаздардың қолында. Елбасы Нұрсұлтан Назарбаев «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан ұстазға жүктелетін міндет ауыр» – деген еді.  Ұрпаққа тәрбие беру, білім нәрімен сусындату – екінің бірінің қолынан да келе бермейді. Сондықтан, ұстаз болу – жүректің батырлығы деп бағалауға болады…