Үй құстары

Аширова Зауре Жайлаубаевна
Алматы қаласы Алатау ауданы
МКҚК «№164 бөбекжай – балабақшасы»
Ересек «Тұлпар» тобының тәрбиешісі

Тақырыбы: Үй құстары

Мақсаты: Үй құстары және олардың балапандарымен таныстыру, үй құстары жайлы түсініктерін ажырата білуді үйрету. Триз технологиясы арқылы қиялын дамыту, ойын арқылы сөздік қорларын молайту. Үй құстарына қамқор болуға, оларды күте білуге, құстарды қорғауға тәрбиелеу.

Әдіс — тәсілі: Сұрақ — жауап, түсіндіру, көрсету, сипаттау, сергіту, ойын.

Қолданылатын көрнекіліктер мен құрал-жабдықтар: интеративтік тақта, үй құстары туралы слайд, үй құстарының суреттері, атрибуттар.

Блингвальды компонент: үй құстары — домашние птицы, әтеш-петух , тауық- курица, балапан-цыпленок,  қаз-гусь, мамыр-гусенок , үйрек-утка, шүрегей- утенок
  

Сөздік жұмыс:  Үй құстары.

-Балалар ең алдымен«Амандасу — адамгершіліктің, әдептіліктің баспалдағы» деп, келген қонақтарымызбен амандасып алайық
Арайлап таң атты
Күн сәулесін таратты
Сәлем деймін досыма
Сәлем деймін апайға
Осы кезде құстардың даусы шығады.
-Балалар бұл ненің даусы?
-Тауықтың даусы
-Тағы ненің даусы шығып жатыр?
-Тоты құс пен көгершінің даусы шығып жатыр.
Жарайсыңдар, құстардың даусын дұрыс таптыңдар. Бүгінгі өтетін ұйымдастырылған оқу іс-әрекетіміз үй құстары туралы екен.
Үй құстарына қандай құстар жатады?
-Балалар үй құстары туралы жақсы біледі екенсіңдер.
Құстар екіге бөлінеді үй құстары және дала құстары болып.
— Балалар, үй құстары жеммен қоректенеді. Олар көктемде балапан басады.Үй құстарының пайдасы көп: жұмыртқасын, етін адамдар тағам ретінде пайдаланады, жүнінен жастық, көрпе жасайды. Сол себептен адамдар үй құстарына қамқорлық көрсетіп, асырайды. Қора жасайды, ұя салады, жем береді, ыдысқа су құйып береді, ұя маңын тазалайды, балапандарына да қорек беріп, көмек көрсетеді.
Қазіргі уақытта тоты құс пен көгершінді де қолға үйретіп үй жағдайында өсіреді. Әр құстардың өзіне арналған ұялары болады.
Үй құстары туралы қандай тақпақ білесіңдер?
Аяулым..
Ақ тауық-ау, ақ тауық,
Ақ тауық неткен қақсауық,
Аяп жүрсем тауықты.
Бір жұмыртқа тауыпты.
— Жарайсыңдар! Енді үйрек туралы тақпақ айтайықшы.
Аяла. Үйрек айтты га-га-га,
Шыға алмаймын жағаға.
Су іздесең мұнда кел,
Самал жел бар мұнда да.
— Енді қаз  туралы тақпағымызды айтайық.
Әміре. Қазым, қазым, қаңқылда,
Көлде жүзіп салқында,
Жем шашайын жейсің бе?
Кәмпит берші дейсің бе?
Жоқ, жоқ, жоқ
Кәмпит тәтті, болмайды ас.
Арпа менен бидай шаш.
Балалар орнымыздан тұрып ата-аналарымыздың көмегімен жасалған ұяны ағашқа ілейік.
Сергіту жаттығуы
Қане қанат жазайық
Қарлығаш болып ұшайық
Ұшып, ұшып алайық
Сауысқан болып секіріп
Торғай болып қонайық
Топқа бөлініп отырып тапсырмаларды орындайық. Бірінші топтағы балалар мақта жастықшасы арқылы балапанның бейнесін жасаймыз. Екінші топтағы балалар алаұанымызды бояуға батырып, бастыру арқылы тауықты бейнелейміз. Үшінші топтағы балаларымызды әр түрлі пішіннен балапанның бейнесін жапыстырамыз.

Қорытынды:
— Балалар, сонымен үй құстарына нелер жатады?
— Үй құстарының балапандарын не деп атаймыз?
— Жарайсыңдар, балалар тілімізге жаттығу жасау үшін үй құстарының дауысын салдық, енді есте сақтау қабілеттеріңді тексеру үшін «Ойлан, тап!» логикалық ойын ойнаймыз, ойынның шарты  дауысын есту арқылы қандай үй құсы екенін табуымыз керек.

— Жарайсыңдар! Есте сақтау қабілеттерің өте жақсы екен.