Ұстанымы биік жаңашыл ұстаз

Саденова Гүлнар Шөптібайқызы – қазақ тілі мен әдебиеті пәні мұғалімі. Аталған мектепте 2009 жылдан бастап жұмыс істеп келеді. Гүлнар Шөптібайқызы осы мектепте ұстаздық еткен уақыт аралығында өзін шығармашылықпен жұмыс істейтін белсенді мұғалім ретінде көрсетіп келеді.

Саденова Гүлнар Шөптібайқызы – заман талабына сай білімді, парасатты, жан-жақты ізденіс үстіндегі ұстаз. Ол – қазақ сыныптарындағы қазақ тілі пәнін оқытудың әдістемесін жете меңгерген, өз ісінің шебер маманы. Гүлнар Шөптібайқызы әр сабақтың тартымды, мазмұнды болып өтуіне ерекше көңіл бөлетін, білім берудің жаңа үрдістерін сыныптағы әр оқушының қабілетіне қарай қолдана білетін жаңашыл мұғалім. Еңбексүйгіштік, оқытуға деген шығармашылық ұстаным – мұғалімге тән қасиеттер. Білікті ұстаз Гүлнар Шөптібайқызының сабақтары өзінің нақты ұйымдастырушылығымен, ғылыми тереңдігімен, қисынды қорытындылауымен ерекшеленеді. Оқушы білімін тексеруді іскерлікпен жоспарлай отырып, басты істерге асқан жауапкершілікпен қарайды. Ол оқу үдерісіне оқушы қызығушылығын арттыру мақсатында тынбай еңбек етіп келеді.

Ұстаз «Қазақ тілінің білім мазмұнына енген әр тақырыптың астарындағы құндылықтарға мән бере оқыту» әдістемелік проблемасы бойынша жұмыс істеуде. Өз жұмысында қазақ тілі мен әдебиетін оқытудың сенімділік дәрежесі жоғары құрамды жобалар, ұжымдық ынтымақтастықпен оқыту, интенсивті және деңгейлік оқыту әдістері енетін жеке тұлғаға бағытталған технологияны қолданады.

Гүлнар Шөптібайқызы оқу материалының жүйелі түрде бөлінуіне, оқушының ойлау қабілетін, тіл байлығын жетілдіруге үлкен көңіл бөледі. Бекіту сабақтарында оқушының өзіндік білім алуын жүзеге асыру мақсатында ұжымдық оқыту әдісінің барлық кезеңдерінің іске асуына ықпал етеді. Сабақтарында оқушыларды қазақ халқының ұлттық дәстүрі, мәдениеті, туған жерінің тарихы, табиғаты туралы тың деректермен таныстыра отырып, оларды ұлтжандылыққа, адамгершілікке тәрбиелейді. Қазіргі кезде Гүлнар Шөптібайқызы 7-сынып оқушыларымен «Жергілікті ақын-жазушы Серік Жетпісқалиевтің шығармашылығы» және 8-сынып оқушыларымен “АЛЖИР: тарихы мен тағдырлар” атты тақырыптар бойынша зерттеу жұмыстарымен айналысуда.

Өз ісіне жауапты, оқушылармен ортақ тіл табыса біледі. Шәкірттері де ұстазының еңбегінің нәтижесі ретінде мектепішілік, қалалық олимпиадалар мен түрлі сайыстарда сапалы білім мен біліктіліктерін дәлелдеп, жүлделі орындарды иеленуде.

Гүлнар Шөптібайқызының оқу мен тәрбие негіздері жайлы ұстаздық   ой-пікірлері, өзіндік көзқарастары туралы мақалалары қалалық, облыстық, республикалық баспасөз беттерінде жарияланып жүр. Республикалық «Ана тілі» газетінде жарияланған «Өзіңді өзің таны», «Бала тәрбиесіндегі әженің рөлі» тақырыбында жазылған танымдық мақалалары ұстаздарға ғана емес, ата-аналарға үлкен ой салғаны анық.

Гүлнар Шөптібайқызы 1999-2006 жылдар аралығы Астана қаласында республикалық «Әлем» баспасында редактор болып қызмет етті, баспагерлік жұмыста да өзінің педагогтық ұстанымын жүзеге асырып, ҚР Білім және ғылым министрлігінің жалпы орта білім департаменті бекіткен «Сынып жетекшісіне арналған журнал» атты мектептегі тәрбие жұмысының жүйелі жүргізілуіне бағытталған авторлық жобасын жасады, аталған журнал күні бүгінге дейін ұстаздар қауымының кең қолданысына ие.

2011-2015 оқу жылдары ұстаз мектеп директорының оқу ісі жөніндегі орынбасары қызметін бірге атқарып келді. Қазақ сыныптарының оқушыларының сапалы білім, саналы тәрбие алуына зор үлес қосып жүрген мұғалім. Мінезі байсалды, әріптестері, оқушылар мен ата-аналар алдында сыйлы да беделді жан.

Білім айнасы