Білім айнасы газеті Республикалық газет Кеше республикалық ардагерлер ұйымының 30 жылдығы, облыстық ардагерлер ұйымының 35 жылдығына арналған облыстық пленум-семинар өтті.
Алқалы мерекелік жиынға облыс әкімі Болат Бакауов, барлық облыстық, қалалық ардагерлер кеңесінің президиум мүшелері, 
өңірлік ардагер ұйымдарының басшылары мен мүшелері, «Нұр Отан» ХДП, облыстық мәдениет, архив және құжаттама басқармасы, білім саласы мен БАҚ өкілдері қатысты.
Шараға арнайы қонақ болып шақырылып қатысқан өкілдің бірі химия ғылымдарының докторы, Павлодар педагогикалық институтының ректоры Алтынбек Нұхұлы еді.
«Ұлт туып, ұлы жолда қызмет істесе, одан зор ұлтқа ырыс пен пайда бар ма?» — деген ұлт ұстазы Ахмет Байтұрсыновтың сөзімен ойын бастаған ғалым-ұстаз, «Ырыс деген періште тек елі мен туған жеріне адал қызмет атқарған адамның қолына қонады. Осы жерге отырған әрбіреулеріңіздің елге жасаған елеулі еңбектеріңіз зор. Біз Сіздермен мақтанамыз. Сіздердің жолдарыңыз бен іздеріңізді басып келе жатқан біздер – ұрпақтар сабақтастығын құрайды» деген ізгі тілегін білдірді. Барлық ардагерлердің қажырлы еңбектеріне деген алғысы мен ықыласы ретінде Павлодар педагогикалық пединститутының мерейтойлық медалін облыстық ардагерлер кеңесінің төрағасы Рымтай Шөкейұлының кеудесіне тағып, «Рухани жаңғыру» бағдарламасы аясында жарыққа шыққан педагог-ардагерлеріне арналған «Өнегелі тұлғалар» атты 11 кітапты (әр ардагерге арналған) да сыйға тартты.
Ләззат Теміртасқызы,
Білім айнасы
Павлодардан
