Білім айнасы газеті Республикалық газет Мектеп табалдырығын аттаған әрбір бірінші сынып оқушыларына «Отан» сөзінің мән-мағынасын түсіндіріп, ұғым қалыптастырамыз. Ондағы біздің мақсатымыз – әр білім алушының жүрегіне Отанға деген сүйіспеншілік пен махаббатының отын тұтату болып табылады. Халық арасында «Отан отбасынан басталады» деген мәтел кең таралған. Яғни, бұл – әр оқушыға тұрып жатқан отбасының өзі кіші Отан болып саналатыны. Отбасында тату өмір сүру керектігін, бір-біріне қамқор болып, қорғау керектігін кең ауқымда ұғындыру қажет деп ойлаймын. Дәл осылай кіші Отанда қалыптасқан жылулық пен махаббаттан үлкен отбасын, яғни Отанын сүюге, оны қорғауға және қамқор болуға дайын жеке тұлға қалыптасады.
Қазіргі қоғамда көптеген теріс мінез-құлық, әрекеттер орын алуда. Соған байланысты елбасы Нұрсұлтан Әбішұлы Назарбаевтың «Мәңгілік ел» идеясы және «Болашаққа бағдар: рухани жаңғыру» бағдарламасы қоғамда талқыланып, көзделген мақсаттар жүзеге асуда. «Болашаққа бағдар: рухани жаңғыру» бағдарламасын елбасы былайша талқылады: «Еліміз жаңа тарихи кезеңге аяқ басты. Мен жыл басындағы халыққа Жолдауымда Қазақстанның үшінші жаңғыруы басталғанын жарияладым. Осылайша, біз қайта түлеудің айрықша маңызды екі процесі – саяси реформа мен экономикалық жаңғыруды қолға алдық. Біздің мақсатымыз айқын, бағытымыз белгілі, ол – әлемдегі ең дамыған 30 елдің қатарына қосылу. Аталған екі жаңғыру процесінің де нақты мақсат-міндеттері, басымдықтары мен оған жеткізетін жолдары бар. Мен көздеген жұмыстарымыздың бәрі дер уақытында және барынша тиімді жүзеге асарына сенімдімін. Бірақ, ойлағанымыз орындалу үшін мұның өзі жеткіліксіз. Мақсатқа жету үшін біздің санамыз ісімізден озып жүруі, яғни одан бұрын жаңғырып отыруы тиіс. Бұл саяси және экономикалық жаңғыруларды толықтырып қана қоймай, олардың өзегіне айналады. Рухани жаңғыру тек бүгін басталатын жұмыс емес. Біз Тәуелсіздік кезеңінде бұл бағытта бірнеше ауқымды іс атқардық. 2004 жылы «Мәдени мұра» бағдарламасы аясында Қазақстан аумағындағы тарихи-мәдени ескерткіштер мен нысандарды жаңғырттық. 2013 жылы «Халық – тарих толқынында» бағдарламасы арқылы әлемнің ең белді архивтерінен төл тарихымызға қатысты құжаттарды жүйелі түрде жинап, зерттедік. Енді осының бәрінен де ауқымды және іргелі жұмыстарды бастағалы отырмыз. Мен еліміз мықты, әрі жауапкершілігі жоғары Біртұтас Ұлт болу үшін болашаққа қалай қадам басатынымыз және бұқаралық сананы қалай өзгертетініміз туралы көзқарастарымды ортаға салуды жөн көрдім. Мен халқымның тағылымы мол тарихы мен ықылым заманнан арқауы үзілмеген ұлттық салт-дәстүрлерін алдағы өркендеудің берік діңі ете отырып, әрбір қадамын нық басуын, болашаққа сеніммен бет алуын қалаймын. Бұл ретте, тұтас қоғамның және әрбір қазақстандықтың санасын жаңғыртудың бірнеше бағытын атап өтер едім.
- Бәсекелік қабілет
- Прагматизм
- Ұлттық бірегейлікті сақтау
- Білімнің салтанат құруы
- Қазақстанның революциялық емес, эволюциялық дамуы
- Сананың ашықтығы…»
Елбасының осындай бағдарламасы аясында, еліміздің мектептерінде Отанға деген сүйіспеншілік пен махаббатты ояту мақсатында түрлі тәрбиелік іс-шаралар өткізілуде. Әр білім алушыны “Cен – еліңнің болашағысың, Отанды қорғау және оған қамқор болу – сенің ғана қолыңда” деген ойды бекіту қажет. Дәл осындай ұстанымнан кейін «Мен – қазақпын», «Мен өз жерім мен елімді қорғауға әркез дайынмын» деген тұлға өсіп шығатынын нақты сеніммен айта аламын.
Әдебиеттер:
Мухамеджан К.А.,
«Сәтбаев қаласының №1мектеп-гимназиясы» КММ,
бастауыш сынып мұғалімі,
Қарағанды облысы,
Сәтбаев қаласы
