Каржауова Мақпал. Айтыс өлең (Халық ауыз әдебиеті)

Каржауова Мақпал Малдыбекқызы
«Новокаменка орта мектебі» КММ
қазақ тілі мен әдебиеті мұғалімі,
Қызылжар ауданы, Солтүстік Қазақстан облысы

Жігіт:

Мен келдім ауылыңа суды кешіп,

Қандырдым сусынымды суын ішіп.

Екеуміз өлең айтсақ ел сүйсінер,

Көктен де құстар қонар, жерге түсіп.

Қыз:

Бойыңды кең далада көрді көзім,

Тарадың шаштарыңды өріп өзің.

Ерлікпен шөл далада қала орнаттың,

«Рахмет», «Құтты болсын!» айтар сөзің.

Жігіт:

Жылқы ойнар кең далада тайдай болып,

Көрінді қара қасың жайдай болып.

Өсірген ата-анаңа көп рахмет,

Құлпырдың он төрт күндік айдай болып.

Қыз:

Ішінде алты қыздың атым- Зере,

Жүремін қыздарменен алма тере.

Ән салып өлең айтып сен келген соң,

Балқыдым, бойым жылып майдай ере.

Жігіт:

Жер мынау көлеңкелі майда тал-ды,

Сұлу қыз шашын сілкіп белге салды.

Әдейі өлең айттым қарасын деп,

Қарайлап қаршығадай мойным талды.

Қыз:

Жеріңіз жер екен-ау ойдым-ойдым,

Өзіңді келе ме деп сертке қойдым.

Келмеген соң «Кешігіп не болды?» деп,

Ішіп тұрған шайымды жерге қойдым.

Жігіт:

Есілдің өзенінде тас болады,

Жарасқан ақ бетіңе қас болады.

Көзіңнен құралайдай жалтылдаған,

Көрген жан балқиды да мас болады.