МАМАНДЫҒЫМ – МЕНІҢ МАҚТАНЫШЫМ!

Сариева Санияш Бахытовна,
Астана қаласы әкімдігінің
№63 «Әсем-ай» балабақшасы
«Лағыл» ортаңғы топ тәрбиешісі

Мамандықтың жаманы жоқ, бірақ оның кез-келгеніне икемділік қажет, бұл жай күнелту, тамақ асыраудың ғана жолы емес, үлкен өнерді, зор шеберлікті қажет ететін нәрсе.
Ж.Аймауытов

Бала пәк, бала тап –таза мөлдір бұлақтың бастауы. Осы бұлақтың көзін ашып, тұнығына қану үшін жылы жүрек, аялы алақан, әр  баланы ертеңгі ел тұлғасы деп құрметтеу, оның адамшылдық ар- ожданын, намысын, жеке басын сыйлау менің басты қағидам! Балалармен жұмыс жасау- үлкен бақыт. Еш нәрсеге алаңдамай мейірімділікке сенетін ортаның бір мүшесі болғанымды мақтан тұтамын.
Менің болашағыма қанат бітірген  — ұстаз әлемі болды. Ұстаз — мен үшін идеал, өмірге құштар, мотиватор, заманауи адам. Осылайша, ел баласына қызмет етіп, сауат ашуға  үлесім тигені  ̶ ел алдындағы перзенттік парызымның орындалғаны деп білемін. Әр бала өзінше әлем. Жаны жақсылыққа құмар, арманшыл. Бәрінен де маңызы – кристалдай таза, сүттей ақ, судай мөлдір бала көңілінің шырағын жағу – басқа бақыт. Балалармен өткен уақыт ең қызық, әрі маңызды сәттер деп айтар едім. Жаныңды жадыратып, жүрегіңе тыныштық беретін саланың әр күні жарқырап тұрмайды. . Көлеңкелі сәттерде бір тұрып, бір жығылып ілгері басудың қаншалықты маңызды екенін де түсінуіміз керек.  Адамның ниеті дұрыс әрі таза болса болғаны, қалауы орындалып, кәсіби биігі жоғарылай түспек. Осы кезге дейін мамандық таңдаудағы шешіміме қылаудай болса да күмән түскен емес. Ұлт ұстазы А.Байтұрсынұлы: «… Бір әдісті болу – олақтықтың белгісі, түрлі әдісті білу – шеберліктің белгісі» деп ұрпақ тәрбиесінде қызмет қылатын «қауымға» айтса керек. Мамандығым жан – жақтылықты, үнемі ізденісті қажет ететін сала. Бала бойындағы сан қырлы ерекшелікті ашу үшін тәрбиеші талғамы биік, өресі жоғары болуы керек деп түсінем. Мамандығымның жақсы тұсы да осы. Тоқтап қалмай үнемі өзіңмен жұмыс жасау. Ата анамен дұрыс қарым қатынас орната білу, ортақ бала тәрбиесі тақырыбында еркін әңгіме айту, баласының жақсы жағымен кемшілігін түзетуге бірлесе жұмыс жасау да үлкен жауапкершілік. Менің кәсіби жолымның басты қағидаты да осы. Үнемі дамыған адам ғана үдерістің үдесінен көрініп,  тұлғалық деңгейге жетеді.
Әр адам мамандық арқылы  өз өмірін қалыптастырады, баянды да мазмұнды етуді мақсат етеді. Лайым, осы жолдағы көшіміз оңға бассын!