“Қазақшаң қалай балақай?”

Жуырда Алматы қаласы
КММ “Түзеу үлгісіндегі сөйлеу мүмкіндіктері шектеулі балаларға арналған №66 бөбекжай-балабақшасында”
“Қазақшаң қалай балақай?” жобасы шеңберінде іс-шара өтті.
Жобаның ұраны:
“Өзге тілдің бәрін біл,
Өз тіліңді құрметте!”.

Іс-шараның — ата-ана, бала, педагог үштігінің ынтымақтастықта жұмыс жасауының жемісі екенін бірден ұғынуға болады.

Бүлдіршіндердің бойына ұлттық құндылықтар мен рухани адамгершілік қасиетті қалыптастыру мақсатында
жоба барысында “Текемет басу” , “Тұсау кесу”, “Бесікке салу”, “Құрақ құрау” дәстүрлері және ұлттық ойындарымыздың бірі — “Асық ату” көрсетілді.
Мектепалды даярлық тобының ерікті
аналарының бірі сәбиін бесікке бөлеп, бесік жырын айтты.
Анамыз “ Бесік жырының сөздері естияр балалардың ой-қиялында сақталып, ананың мейірім-шапағатын арттырады” — дейді.
Сонымен қатар балалардың сөздік қорын дамыту және қазақ тілін оқыту,
ата-аналармен байланыста болу үшін жасалған мобильді стенд кітапшасы таныстырылды.
Бұл кітапша арқылы ата-аналар балаларына қазақ ертегілерін оқып, әндерін қосып бере алады.
Іс-шара бүлдіршіндердің “Үйшік” және “Бауырсақ” ертегісі қойылымдарымен аяқталды.

Жоба жетекшісі әрі балабақшаның меңгерушісі Зипарова Гульнара Ахметжановна
“Біздің басты мақсатымыз: Қазақ тілі мен дәстүрі ұрпақтан-ұрпаққа жалғасып келе жатқан қасиетті қазынамыз. Бүлдіршіндерді ата-бабаларымыздың дүниетанымын қастерлеуге,
дәстүрімізді дәріптеп, салтымызды сыйлауға үйрету,
педагог пен ата-ана арасындағы байланысты нығайту” — дейді.

ҚР Президенті Қ.Тоқаев
«Тәуелсіздік бәрінен қымбат» атты мақаласында: «Мемлекеттік тілді білу – Қазақстанның әрбір азаматының міндеті»- деп нақты атап, көрсетіп берген еді.
Халқымыздың тілін, салт-дәстүрін, ұлттық ойындарын құрметтеп, қолдап, дәріптеп жүрген жобаның мерзімі ұзағынан болсын деп тілейміз.

BILIM AINASY
Алматы қаласынан
Ақерке Амангелдіқызы