«Судың пайдасы және қасиеттері»

Баяхметова Алмагүл Әскербекқызы
КМҚК  №141 бөбекжай-балабақшасы
Педагог-модератор

Оқу іс-әрекетінің тақырыбы: «Судың пайдасы және қасиеттері»

«Таным» білім беру дағдысы.
Бөлімі: Қоршаған ортамен танысу.
Мақсаты: Балаларды судың қасиетімен,  судың тіршілік иесі үшін мәні, қажеттілігі туралы түсінігін кеңейту; балаларды қарапайым зерттеу әдістеріне тарту. Баланың сумен эксперимент жасау процесінде танымдық қызығушылықтарын ояту, суды үнемдей білуге тәрбиелеу.
Қажетті құрал — жабдықтар: су, стақандар , шприц,езілген бояу түрлері, қант,мұз,түрлі-түсті кәмпиттер,тарелка.

Тәрбиелік міндеті: топпен жұмыс жасай білуге, суға ұқыпты қарай білуге тәрбиелеу.

Балалар, бүгінгі оқу іс-әрекетіміз судың қасиеттерімен танысуға арналады
Жылт-жылт еткен,
Жырадан өткен. (су)

Аяғы жоқ жүреді,
Сылқ-сылқ күледі. (су)

— Сендер су туралы не білесіңдер?
— Суды қайда қолданамыз?
Балалар бұдан қандай қорытынды шығаруға болады.
— Ия балалар сусыз  тіршілік жоқ. Сендер дұрыс айтасыңдар,жануарларға да өсімдіктерге де су керек, оларды үнемі суғарып тұру керек.Өйткені олар сусыз өліп қалуы мүмкін. Ал адамдарға су тамақ істеуге, жуынуға, ішуге керек. Ешқандай тірі зат сусыз өмір сүре алмайды. Су – тіршілік нәрі. Ғалымдардың айтуынша, адам организмі 86 пайызы судан тұрады екен. Егер организмде судың мөлшері азайса, онда адам әртүрлі ауаруға шалдығуы мүмкін екен.

Енді сумен тәжірибе жүргіземіз.
Балалар алдымызда тұрған не?
1 — тәжірибе. Су түссіз. Бір стаканға сүт,бір стаканға су құйып,екеуіне де қасық салып көреді. Қайсы стаканнан қасық көрінеді,қайсысынан көрінбейтінін анықтайды. Тағы бір дәлелді көрейік,бір стакандағы суға гуашь бояуын қосайық. Не байқадық? Яғни,судың түсі түссіз,мөлдір болады.Оған тек қоспалар,бояулар қосқанда ғана өзгеретінін байқадық.
2 — тәжірибе Су иіссіз. Иіскеп көрейік. Иісі бар ма? Стакандағы суға ванилин қосып көрейік. -Не байқадық? Иісі өзгергенін байқадық.
3 — тәжірибе Су дәмсіз. Стакандағы суға қант салайық. Енді дәмін татып көрелік. Не байқадыңдар? Дәмі тәтті болғанын байқадық.

4 тәжірибе. Су тез сіңеді.  Ыдыстағы гүлге  су құю арқылы судың сіңгіш қасиетін байқаймыз.

Судың үш күйі болады
Балалар мен сендерге тағы бір қызық көрсеткім келеді.
(балаларға мұзды көрсету)
— Бұл не?
— Қолымызға ұстап біраз тұрайық. Не байқадық?                                                         -Мұздың ерігенін байқадық. Балалар, бұл судың қатты күйі екен. Ол қалайша қатты болды?
— Дұрыс айтасыңдар су өте суық жерде қатып мұзға айналады. Бұл судың қатты күйі.
— Енді мына стакандағы суды тәрелкеге құяйық.
— Бұдан не байқадық?
— Суды төгуге болады. Ол ағады, сұйық.
— Енді мына шәйнекке қарайық? Шәйнектен не шығып жатыр?
— Бу қайдан шықты?
— Яғни, суды белгілі бір температурада қайнатқанда буға айналады.
— Бұл іс — әрекеттен қандай қорытынды шығарамыз.
— Су қайнағанда буға айналып жоғалып кетеді екен.

«Тәтті кемпірқосақ» тәжірибесі.

mm dens тәттілерін тарелкаға тізіп,үстінен су құямыз.Тәтті ерігенде кемпірқосақ пайда болады.

«Стакандағы кемпірқосақ» тәжірибесі.

Төрт стаканды қатар қойып,оның біріншісіне бір ас қасық,екіншісіне екі ас қасық,үшіншісіне үш ас қасық,төртіншісіне төрт ас қасық қант саламыз. Үстіне үш ас қасықтан су құямыз да араластырамыз. Енді осы суға төрт түрлі гуашь бояуын қосып араластырамыз. Енді төртінші стаканнан бастап шприцпен сорып алып біртіңдеп, кезекпен басқа стаканға құямыз. Стакандағы кемпірқосағымыз дайын болды.

Оқу іс-әрекетін қорытындылау.

Балалардың су туралы мақал-мәтелдеріне ,тақпағына кезек беру.

1. Су анасы – бұлақ,

Сөз анасы – құлақ. ( Амина)

2. Су тіршілік көзі (Әлиасқар)
3. Сумен ойнама – батарсың,

Отпен ойнама – жанарсың.(Раяна)

Су ішкен құдыққа түкірме. (Бекасыл)
Суды шашпа, бекерге төкпе (Қаламқас)

Сылдырлайды мөлдір су

Мөлдір суға бетіңді жу

Таза болсын әрдайым

Беті қолың,маңдайың.

Суды жақсы көреміз.

Тазалықты сүйеміз. — дей келе оқу іс-әрекетін аяқтап,суды үнемдеп пайдалануға және бұлақ,өзен,көлдерді таза ұстауға,ластамауға кеңес беремін.