Ұстаздар күніне арналған концерт

Хаметова Айнаш Ораловна
Астана қаласы әкімдігі
№62 «Нұрсәуле» балабақшасы
музыка жетекшісі

Жүргізуші:  Сәлеметсіздерме, құрметті  әріптестер, ұстаздар, тәрбиешілер!  Бүгін «Ұстаздар күніне» арналған мерекелік концертімізге қош келдіңіздер!

Ұстаз — ұлағатты есім. Күн сәулесі өмірге қандай жарық берсе, ұстаз есімі де шәкірттерге күндей жарық береді. Ол – әншіге де, жыршыға да, президентке де, жүргізушіге де, биші ге де сабақ берген. Әрбір маман иесі осы Ұлы ұстаздың алдынан өткен.

Мұғалім  туралы қанша мақтау сөз айтсақ та тауыса алмаспыз. Ендеше, қымбатты, тәрбиеші апайлар, ұстаздар, шәкірттеріңіздің өздеріңізге арналған мерекелік бағдарламамызды бастауға рұқсат етіңіздер!

Құттықтау сөз балабақшамыздың меңгерушісі Касенова Асем Зайтинқызына беріледі!

(марапаттаулар)

Жүргізуші:   Ұрпақпен өмір жолы жалғанады,
Көңілді күндер тусын алдан әлі
Ән-шашу әсем әуен, түрлі өнер,

Бүгінгі күн сіздерге арналады.
Вокал тобының орындауында «Ұстаз ана» әнін қабыл алыңыздар!

Ән «Ұстаз ана»

Жүргізуші: Асыға сәлем жолдап жүректен біз
Бірге өсіп ен жайлаған ұл менен қыз,
Тәтті күй, асқақ ән мен әсем биді,
Сіздерге тарту етіп ұсынамыз,-деп алдарыңызда балабақшамыздың  мың бұралған бишілерін ортаға шақырамыз!

Би «Кішкентай балалармыз»

Жүргізуші: Ұстаздар! Қандай ғажап халықсыздар!
Шәкіртке шыңдай биік алыпсыздар.
Жан біткен жанарына нұр сыйлаған,
Күндей боп күлімдеген жарықсыздар.

Келесі тамашалайтындарыңыз балалардың орындауында

«Аспаптар оркестрі»

Жүргізуші: Бүгінгі күн құшақтарың гүлге толсын,
Дендеріңнің саулығы мықты болсын.
Білімменен суарған шәкірттерің,
Төл мерекең ұстаздар құтты болсын!

Құрметті әріптестер, сіздер отыруға шаршаған шығарсыздар, сіздерді сахнаға шақырып, бойымызды сергітіп алайық деп едік.

Тәрбиешілер арасында музыкалық ойын (Сергіту сәт)

(Тәрбиешілерді ортаға шақыру, олар экранға қарап қимылдарды қайталайды)

Жүргізуші: Мұғалім, ғазиз мұғалім-
Сарқылса мәңгі бұлағым
Мерекелік  бүгін тойыңда
Арналады  саған бұл әнін.

Хор : «Біз бақытты баламыз»

(Барлық қатысушылар шығады)

Жүргізуші: Құрметті ұстаздар! Төл мерекелеріңіз құтты болсын, дендеріңізге саулық, отбасыларыңызға амандық  тілейміз ! Көңілдеріңіз ашық аспан сияқты таза болып, жұмыстарыңыз жемісті болсын!

Осымен біздің шағын мерекелік бағдарламамыз аяқталды, келесі кездескенше, сау болыңыздар!