Мамандықтың маңызы…

Жумабекова Майра Еслямовна,
Астана қаласы әкімдігінің
№52 «Еркетай» балабақшасы
музыка жетекшісі

эссе
Құлақтан кіріп бойды алар,
Әсем ән мен тәтті күй.
Көңілге түрлі ой салар,
Әнді сүйсең менше сүй.

Абай Құнанбаев

         Әлемде әртүрлі  мамандықтар бар, және әрқайсысының өз маңыздылығы бар! Бірақ мен жасап жүрген мамандық, менің ойымша  ең маңызды және қажетті мамандықтын бірі деп ойлаймын! Сіздер сұрайтын шығарсыздар: «Қандай мамандық, ең қажетті және маңызды?».
Менің мамандығым – музыка жетекшісі… Бұл мамандық әртүрлі мамандықтарды біріктіретіндігімен ерекшеленеді, музыкант және сүретші, сценарист, режиссер, костюмер, актер, гриммер! Музыка жетекшісі, мерекелік ертеңгіліктерге арналған сценарий жазады, музыка залын мерекеге безендіреді, қызықты мерекелер өткізеді. Балалардың музыкалық және жалпы дамыту процесінде қаншама іс- әрекет түрлерін меңгеру керек. Бұл ән айту, музыка тындау, театрландырылған қойылым, би билеу, музыкалық аспаптарда ойнау. Менің мамандығым және  сүйікті ісім бір болғанына қуаныштымын. Абай атамыз айтқандай, «неге арналсаң, соны істе»! Бұл менің сүйетін ісім!

Кішкентай кезінен мен ән айтуды, би билегенді жақсы көретін едім! Менің нағашым баян, домбыра, гитара аспаптарында ойнайтын, ән айтатын. Сол кісі маған домбыра тартуды үйретті, бірге ән айтатын едік! Қанша уақыт өзімді білсем, сонша уақыт мен домбыра тартып ән айтып жүрмін! Мектеп бітірген соң, музыкалық колледжге түсіп оқып музыкалық білім алып шықтым! Жылдар өтіп, тағдыр мені балабақшаның қабырғасына әкелді. 22 жыл бойы балаларға ән үретіп, өнер және музыка жолында жүрмін!  Музыка жетекші —  менің сүйетін және өмірлік ісіме  айналды!
Мен балаларды жанымдай жақсы көрем… Өйткені бала мен үшін тазалық пен пәктіктің, шынайылық пен туралықтың айнасы. Олар қуанса шын қуанып, ренжісе шын ренжи біледі. Олардың жаны жалғандықты, жасандылықты сүймейді, не айтса да әділ, шындықты айтады. Әр бала жеке тұлға. Педагог ретінде, мен де, баланың жеке тұлға қалыптасуына өз үлесімді қосқым келеді. Біз болашақ баланың іргетасын қалаймыз, бұл нәресте қаншалықты дұрыс дамитыны бізге – педагогтарға байланысты.  Менің басты міндетім, педагог ретінде, балалардың патриоттық сезімдерін, Отанға және туған жерге деген сүйспеншілік пен құрмет, ата – анаға деген махаббат пен силастыққа тәрбиелеу. Өз елінің лайықты азаматтарын, нағыз патриоттарын тәрбиелеу – менің алдыма қойған маңызды міндеттерімнің бірі. Менің ойымша тек музыка арқылы осының барлығын жеткізу, түсіндіруге болады. Кез келген бала билегенді, ән айтқанды, ойын ойнағанды ұнатады. Мен үшін үлкен бақыт, балалардың жүзінен күлкі қуаныш көрген кезде, олармен бірге ән айтып би билеп ойын ойнап өзім де кішкентай бала секілді сезінемін. Музыка іс әрекетінде балалармен Отан, туған жер, ана, әже туралы әндер айтамыз, Қазақстанның композиторлармен танысып, олардың шығармаларын, күйлерін тыңдаймыз, музыкалық аспаптарда ойнаймыз. Осылайша ән, би, ойын, музыка тыңдау арқылы балалардың болашақ тұлғаның әлеуметтік-адамгершілік жағының қалыптасуы жүреді. Мен таңдаған мамандық ерекше! Ол жарық береді, жанашыр болуға, сезінуге, білдіруге, өз сезімдері мен эмоцияларын, Отанға деген патриоттық сезімдерін оятады, ата – анаға деген сыйластық, қоршаған әлемге қатынасын жеткізуге үйретеді.
Мейрам күндері – балалар үшін жан тебірентер ән мен күйдің, әсем бидің, көз қуантар көріністердің қызықты бір әлемі. Сондықтан да, мейрам күндерін балабақшаның әрбір тәрбиеленушісі асыға күтеді, өз өнерлерін ата — аналарына көрсетуге асығады.  Балалар ертеңгілігін дайындап, өткізуде тәрбиешілердің де  орны ерекше. Барлығы тәрбиеші мен  музыка жетекшісі бірлесе жасайтын жұмыс. Алдына ала сценарий құрастырамын, тәрбиешілермен  бірге балаларды дайындаймыз, ойнайтын кейіпкерлерді рөлін тәрбиешілермен жаттаймын, музыка залын безендіріп, кейіпкерлердің киетін киімдерін ойластырып, әр персонажға музыка іздестіремін.  Жұмыс барысы шығармашыл, креативті, және  ұйымшыл болуды талап етеді. Қалай қиын болса да, менің жасап жүрген ісім маған ұнайды.

Мұхтар Әуезовтің: «Әнге әуес, күйге құмар бала жаны сұлу, өмірге ғашық болып өседі» деген. Бұл сөз бекер айтылмаған, музыка баланың сезімін оятады. Музыка әлемі — адамзат мәдениетінің байлығы ішіндегі мұхиттай шексіз, ғажап дүние. Музыкада адамның асқақ ойлары мен әр түрлі сезім иірімдері бейнеленеді. Музыканың адам жан дүниесіне тигізетін әсері орасан зор. Сондықтан менің мамандығым – музыка жетекшісі, маңызды деп есептеймін!