Қазіргі кездегі педагогтың рөлі

Ниязбаева Лунара Болатовна,
Астана қаласы әкімдігінің
№77 «Қошақан» балабақшасы
қазақ тілі мен әдебиеті пәні мұғалімі 

Қазіргі кездегі педагогтың рөлі

«Маған жақсы мұғалім бәрінен де қымбат, өйткені мұғалім – мектептің жүрегі»-деген Ыбырай Алтынсариннің сөзі бүгінгі таңда қандай дәрежеде? Расымен,  қазіргі таңда педагогтың рөлі қандай?

Ақын, педагог М. Жұмабаев «Бала тәрбиесі – бір өнер, өнер болғанда ауыр өнер, жеке бір ғылым иесі болуды тілейтін өнер» деген екен.   Бүгінгі таңда осы өнерді меңгерген ұстаздар қауымының алдында үлкен міндеттер қойылды. Заманның қарқынды дамуына байланысты ғылым мен техниканы озық меңгерген интеллектуал жастарды тәрбиелеу педагогтардың жоғары шеберлігін талап етеді.

Қазіргі қоғамдық ортадағы мұғалімдердің қызметі мен рөлі – алдындағы оқушысына ғылымның негіздерінен толық ақпарат беріп қана қоймай, оны әлемдік білім, ақпарат, экономика кеңістігіне жетуге, яки қатаң бәсеке жағдайында өмір сүруге тәрбиелеп, дамытуы керек. Заманауи  ақпарат пен техниканың дамыған заманында балаға берілетін білім де сол техникалармен байланысты болу керек деген ойдамын.

Ешкім болдым, толдым деп айта алмайды, себебі білгенімізден, әрине білеріміз көп. Ұстаз деген ұлы есімді арқалау өмір бойы өз білімің мен шеберлігіңді шыңдау деген сөздің синонимі деп қабылдаған дұрыс шығар.  Педагог шеберлігі дипломмен қосарланып келмейді немесе кездейсоқ сәттілікпен қонбайды. Педагогика саласын таңдаған әр жан ол үшін қаншама ізденістер мен толғаныстарды, бірде сәтті, бірде сәтсіз тәжірибелерді бастан өткереді.

Мен, қазақ тілі мен әдебиет пәнінің мұғалімімін. Бұл менің бала күнгі арманым. Осы арманымды арқалап, еңбек жолымда қаншама шәкіртті үлкен жолға сәт – сапар тілеп шығардым. Ұстаздықтың өзге мамандықтардан айырмашылығын да осы кезеңде түсіндім, себебі ұстаздықты таңдаған адамның бойында бір-біріне тоғыспайтын қаншама сан мың мамандықтың сарқыны бар. Бірде актер, бірде аспазшы, бірде тіпті басқа бір маманның рөлінде отырғаныңды да түсінбей қалатын кездер аз емес. Мен үшін басты өнер – алдыңдағы шәкіртіңді жақсы көру.

Егер өзің жақсы көрмесең, өзгеге сезімнің не түсіндіре алмайсың, егер өзің үйренуге талпынбасаң, өзгеге үйрете алмайсың, егер өзің шеберлігіңді жетілдірмесең, өзгенің таланты мен дарындылығын байқамайсың, егер өз бойыңда аталған қасиеттерді жинақтамасаң, өзгенің бойына дарыта алмайсың, сол үшін  үнемі өз біліміңді жетілдіріп отыруың қажет. Ұстаздар қауымына әр түрлі  білім беру технологияларын, интернет платформалары мен әртүрлі IT бағдарламаларды қысқа мерзімде үйреніп қана қоймай, сол арқылы балаларға сапалы білім мен саналы тәрбие беруге тура келді.

Қорытындылай келе, баланы оқыту мен тәрбиелеудің майталман шебері болу үздіксіз, тынымсыз еңбек пен шығармашылық ізденістің жемісі. Бұл – бір адамның қолынан келмейтін күрделі іс. Баланы дұрыс тәрбиелеу үшін әр кісінің өз тәжірибесі жетпейді. Басқа адамдардың да тәжірибесімен танысу керек. Өмірде ақылмен, әдіспен күресе білетін адам шығару, барлық адам баласын әділ жолмен өрге сүйрейтін ер шығару деген сөз.  Ал қазіргі заманға сай педагог болу дегеніміз көштен ілгері бір қадам алда болу деген сөз деп есептеймін. Шәкіртке жаныңды, жүрегіңді сыйлау деп түсінемін.

Еліміздің әр педагогы осындай ұстанымда болса, еліміздің іркесі берік, болашағы жарқын болмақ.