Білім айнасы газеті Республикалық газет Алматы қаласы білім басқарамасына қарасты № 183 бөбекжай-балабақшасында «Мектепке дейінгі ұйымдардағы жалпы мейірбикелік жұмыс және тамақтануды ұйымдастыру» тақырыбында аудандық семинар өтті.
Басқосуға Алатау аудандық білім бөлімінің бас маманы Зейтова Мәншүк Сапиновна, әдістемелік бірлестіктен Салтанат Нұғманқызы және аудандағы балабақшалардың мейірбикелері мен аға мейірбикелері қатысты.
«№ 183 бөбекжай-балабақшасының» меңгерушісі Шаметова Ғалия Асқарқызы барлық маманның жұмысына сәттілік тілеп, ұжымға алғыс айтты. Іс-шара қонақтарды ширату мақсатында балабақша психологы Гульнар Есимбаеваның бастамасымен сергіту ойынынан басталды. Ойын ойнап, сергіп алған мамандар «№ 183 бөбекжай-балабақша» мейірбикесі Жолдасбаева М.К және 153 балабақша мейірбикесі Ибаш Г.М дайындаған тамақтануды ұйымдастыру тақырыбындағы презентациясын тамашалады. Монитордан тәрбиеші Ашкеева Ақеркенің арнайы тақырып бойынша түсірген роликтері көрсетіліп, жан-жақты талқыланды. Топтағы тазалық шараларына терең тоқталып өтті. Ыдыстар мен сөрелерді уақытылы тазалап тұру, даладан келген балалардың қолды жуу ережелері сияқты мәселелерге тоқталып, ойыншық жуатын арнайы ыдыстың болу керектігін айтты. Балалардың тамаққа отыруы, жуынған соң әрқайсысының жеке сүлгісінің болуы, жалпы әр қызметкердің тазалыққа үлкен мән беріп, ережелерін білуі міндет екенін қадап айтты. Сонымен қатар «153 бөбекжай-балабақшасының» аспазшысы ас мәзірін жасау, балаларға тамақ дайындау барысында аскөкті жуу, нан сақталатын сөрелердің тазалығын сақтау туралы мәлімет берілді. Бейнероликте бүлдіршіндердің балабақшаға қабылданған сәттен түлеп ұшқанға дейінгі уақытта сақталуы тиіс барлық тазалық нормалары қамтылған.
Семинарда аталмыш балабақша мейірбикелерінің авторлық жұмыстары да таныстырылды. Онда олар бала денсаулығына пайдалы тағамдармен қоса гигиена талаптарын сақтау мәселелеріне қатысты мағлұмат берді. Кез келген адам QR код арқылы кіріп, қажет ақпаратқа бірден автоматты түрде қол жеткізе алатындығы айтылды. Семинар соңы алынған тақырыпқа қатысты сұрақ-жауап форматындағы кері байланыс, пікір алмасумен жалғасты. Аудандық білім бөлімінің бас маманы Мәншүк Зейтова және балабақша меңгерушілері семинардан алған әсерлерімен бөлісіп, тақырыпқа сай дайындалған балабақша мамандарының жұмысына ризашылығын білдірді. Келешекте осындай игі шаралар жиі өткізіліп тұрмақ.
Алматы қаласы
Білім айнасымен
