«Тәуелсіз елім – Қазақстаным

Тәңірберген Зәуреш Тәңірбергенқызы
Қарағанды облысы білім басқармасының
Приозерск қаласы білім бөлімінің
«№2 жалпы  білім беретін мектебі» КММ
бастауыш сынып мұғалімі

Тәрбие сағатының мақсаты: Оқушыларды Отанды, елді, жерді сүюге туған ел тарихын білуге, еліміздің мемлекеттік рәміздерін қастерлеуге тәрбиелеу.

Тәрбие сағатының көрнекілігі: презентация, Қазақстан Республикасының мемлекеттік рәміздері, портреттер

Тәрбие сағатының барысы:

Мұғалім сөзі: Сәлеметсіздер ме, құрметті бүгінгі тәрбие сағатымыздың қонақтары? Биыл, еліміздің егемендік алғанына – 30 жыл толып отыр. Ата-бабамыз үш ғасырға жуық уақыт бойы армандаған тәуелсіздік! Тәуелсіздік алу жолында халқымыздың басынан қандай оқиғалар өтпеді, десеңізші! Тәуелсіз ел тарихы – Отаншылдықтың, ерліктің, елдіктің не екенін дәлелдейтін тамыры терең бай тарих. Олай болса, 1 «Г» сынып оқушыларының дайындаған тәрбие сағатын ашық деп жариялауға рұқсат етіңіздер.

Мемлекеттік әнұран орындалады.

Өркен: Атыңнан айналайын егемен ел,

Тәуелсіз күнің туды, кенеле бер.

Мерейің құтты болсын Қазақстан!

Ғасырлар тойы болшы келе берер!

Амина: Топырағыңмен тамырласып кіндігім,

Қуаныштан жүрек толқып тұр бүгін,

Нығайтамын елдігімнің тұғырын,

Берік ұстап Тәуелсіздік тізгінін

Ерболат: Шежіресін шертсе күй ғып көне жер,

Ертеңіне, өркеніне сене бер.

Дүниені дүбірімен таңдантқан,

Міне, осындай Қазақстан деген ел.

Ән: «Тәуелсіздік – ел бақытының белгісі»

Мұғалім: Көк байрағы көкке жебіреген егемен елдің тәуелсіздік хроникасына назар аударайық.

Рамазан: 1 желтоқсанда Қазақстан Республикасының Президенті сайланды.                          16 желтоқсанда Қазастан Республикасының тәуелсіздігі жарияланды.

Диас: 2 наурызда ҚР-сы Біріккен Ұлттар Ұйымына мүше болды. 4 маусымда ҚР-ның Мемлекеттік рәміздері дүниеге келді.

Рамазан: Ұлттық өрнек мұрамыз

Адастырмас мұраттай.

Нық көтеріп тұрамыз

Жалауды біз құлатпай.

Айзере: Бұлт баспасын күнімді

Тарылмасын өрісім

Биік ұстау Туымды-

Қасиетті борышым

Арман:Бабам тұлпар жаратты

Құлынын да танып – ақ

Тұлпар барда қанатты

Шайқалмайды шаңырақ

Аяулым:Тәуелсіздік көркі ол да,

Өркениет өрінде

Нұр төгеді елтаңба

Ақ Орданың төрінде

Айзере:Батырлыққа уызынан жарыған,

Ер түркіні байрағынан таныған

Өзі ақын, өзі әнші халықта

Кім айта алар

Болмаған, — деп – Әнұран?!

Бекнұр: 1993 жылы «Қазақстан Республикасының тұңғыш Конституциясы» қабылданды. 1995 жылы екінші рет қабылданды.

Айару: 1998 жылы  Астана қаласының ашылу рәсімі болды. 2019 жылы                        20 наурызда Нұр-Сұлтан болып өзгерді.

Аяулым: Халқымның мақтанашы – алып тұлға,

Әлемнің назарына ауды Ақордаға.

Бәйтерек – көкке қолын созып тұрған,

Ұқсайды менің асқақ арманыма

Би: «Шаттық биі»

Мұғалім: Тәуелсіздіктің 30 – жылдығымен тұспа тұс келген мерейтойлық күнерді атап өтсем ( слайд арқылы):

1. Семей ядролық полигонының жабылуына – 30 жыл;
2. Қазақтың аса көрнекті ағартушы-педагогі Ыбырай Алтынсариннің туғанына – 180 жыл;
3. Қазақ халық поэзиясының әйгілі тұлғасы, өлең сөздің дүлдүлі, жырау, жыршы Жамбыл Жабаевтың туғанына – 175 жыл;
4. Қазақтың әйгілі күйші-композиторы, Қазақстанның халық әртісі Дина Нұрпейісованың туғанына – 160 жыл;
5. Көрнекті қоғам және мемлекет қайраткері, Алаш қозғалысының жетекшісі, публицист, ғалым, аудармашы Әлихан Бөкейханның туғанына – 155 жыл;
6. Қазақ ақыны, әдебиеттанушы ғалым, түркітанушы, публицист, педагог, аудармашы, қоғам қайраткері Ахмет Байтұрсынұлының туғанына – 150 жыл;
7. Қазақтың лирик ақыны Мұқағали Мақатаевтың туғанына – 90 жыл;
8. Этнограф, өнертанушы, әдебиетші, журналист, қоғам қайраткері Ақселеу Сейдімбектің туғанына – 80 жыл.

Абусаид:Тәуелсіздік – тірегім алмас үнді,

Тәтті үміті халқымның сан ғасыры,

Көк байрақты , кемеңгер кемел ойлы

Келбетіңнен көремін жалғасымды.

Райяна: Егемен елімнің ертеңі деп,

Елбасы баға берді жастарыма

Оқу оқы, білім ал, елің үшін

Еңбек ет тыным таппай, жан аяма

Айсель: Тәуелсіздік – шырайлы лағыл таңсың,

Жүректерге үміт боп жағылғансың

Аяулысың білмеген алақаннан

Суып барып қайтадан табылғансың.

Жансерік: Қазақстан қасиетті ұғым бұл,

Ей,келешек, жан тәніңмен ұғын, біл.

Он бір әріп не мағына береді,

Ал, толғайық жеткенінше қызыл тіл.

Іңкәр: Т- білдіреді теңдікті

Нұрбол: Ә — әдептілік, әлдікті

Тамирис: У — уайымсыз уақытты

Мирас: Е — егемендік елдікті

Інжу:Л — дейді лағып, лепірме

Амина: С — сенімділік секілді ең

Өркен: І — ілтипат пен ізет қой

Алинұр: З — зиялылық тілек қой

Айнара: Д — шақырады достыққа

Рамазан: К — дейі күн боп көктегі

Хормен: — Көз алартпа, көршілерге қол сұқпа.

Ән: «Көк тудың желбірегені»

Оқушылар: Әлемге атың жайылсын жарқын,

Жасай бер, жаса, Қазақстан!

Баянды болсын бақытың, халқың,

Жасай бер, жаса, Қазақстан!

Мұғалім: Осымен, Тәуелсіздігіміздің 30 жылдығына арналған тәрбие сағатымыз аяқталды. Тәуелсіздігіміз жасай берсін, Мәңгі болсын!