Білім айнасы газеті Республикалық газет Жаз – әрбір бүлдіршін үшін асыға күтетін ерекше мезгіл. Күннің шуақты шапағы мен көк майса табиғаттың құшағында ойнау, жаңа нәрселерді танып-білу – балалардың денсаулығын нығайтып, жан-жақты дамуына әсер ететін маңызды кезең. Осыны негізге ала отырып, Алматы қаласы Білім басқармасына қарасты КМҚК «№147 бөбекжай-балабақшасы» «Бақытты балалық шақ» атты жазғы сауықтыру кезеңін ұйымдастырып, оны мазмұнды әрі жарқын іс-шаралармен байыта білді.
Аталған балабақша ұжымы балғындардың жаз мезгілін тиімді әрі қызықты өткізуіне ерекше мән беріп, балалардың физикалық, шығармашылық және эмоционалдық дамуын көздейтін бірқатар сауықтыру шараларын жүзеге асырды. Тәрбиешілердің кәсіби шеберлігі мен шығармашылық ізденісінің нәтижесінде әр күн бала үшін жаңалыққа, қуаныш пен шаттыққа толы болды.
Апта сайын өткізілген «Денсаулық күндері» балалар үшін сергектік сыйлаған ерекше сәттерге толы болды. Таза ауада жасалған таңғы жаттығулар мен әртүрлі қимыл-қозғалыс ойындары бүлдіршіндердің физикалық белсенділігін арттырып, бой сергітуіне оң әсер етті. Балабақша ауласында ұйымдастырылған спорттық эстафеталар, секіру, жарысу, доппен ойындар балалардың қызығушылығын арттырып, салауатты өмір салтына деген оң көзқарас қалыптастырды.
Жазғы серуендер барысында тәрбиешілер балаларды табиғат құбылыстарымен таныстыру мақсатында тақырыптық бақылау мен танымдық бағыттағы іс-шаралар ұйымдастырды. Балалар құстардың дауысын тыңдап, жәндіктердің тіршілігін бақылап, өсімдіктерге күтім жасай отырып, табиғатпен үйлесімді өмір сүруді үйренді. Бұл әрекеттер олардың қоршаған ортаға деген қызығушылығын арттырып, байқағыштық, жауапкершілік қасиеттерін дамытты.
Балалардың қиялы мен ой-өрісін дамыту мақсатында қолөнер, сурет салу, табиғи материалдармен жұмыс істеуге арналған шеберлік сағаттары өткізілді. Балалар өз қолымен жасаған бұйымдарын көпшілікке көрсетіп, еңбегінің нәтижесіне қуанды. Түрлі-түсті қағаздардан аппликациялар жасау, бояумен сурет салу, құммен жұмыс істеу – балалардың ұсақ моторикасын дамытып қана қоймай, эстетикалық талғамының артуына ықпал етті.
Жазғы кезеңнің бір күнін ерекше көңілді ету мақсатында «Күлкі мен шаттық әлемі» атты ойын-сауық күні ұйымдастырылды. Балалар ән айтып, би билеп, түрлі көңілді ойындарға қатысып, нағыз мерекелік атмосфераны сезінді. Бұл күн кішкентайлардың жадында ерекше естелік болып қалды. Ұйымдастырылған ойындар олардың достықты, бірлікті сезінуіне және ортада өзін еркін ұстауына мүмкіндік берді.
Балабақша тәрбиешілері балаларға экологиялық білім мен тәрбие беру бағытында жоспарлы жұмыстар жүргізді. Экологиялық тәрбие сағаттарында бүлдіршіндерге қоршаған ортаны таза ұстау, табиғатты сүю, әрбір тіршілік иесіне жанашырлықпен қарау туралы түсініктер берілді. Бұл сабақтар балалардың экологиялық мәдениетін қалыптастыруда маңызды рөл атқарды.
Аптап ыстық күндері балалардың көтеріңкі көңіл-күйін сақтау және дене қызуын реттеу мақсатында су ойындары ұйымдастырылды. Арнайы жабдықталған алаңда балалар қауіпсіздік ережелерін сақтай отырып, суды шашып ойнады, шелектер мен құмсалғыштармен жұмыс істеп, қуанышты көңіл-күйге бөленді. Су ойындары – жаз мезгілінің нағыз сәніне айналды.
Балабақшада өткізілген «Бақытты балалық шақ» жазғы сауықтыру кезеңі әр баланың жүрегінде жарқын естеліктер қалдырды. Түрлі бағыттағы іс-шаралар балдырғандардың физикалық саулығын нығайтып, танымдық және шығармашылық қабілеттерін арттырды. Ең бастысы – балалар көтеріңкі көңіл-күймен, достық пен шаттықты сезініп, шынайы бақытқа бөленді.
Осындай мәнді де мазмұнды кезеңді ұйымдастырған №147 бөбекжай-балабақшасының меңгерушісі -Бейсебекова Гулайм Жумабаевнаға,
әдіскер — Шаханова Назерке Мейрбекқызы және ұжымға ата-аналар да алғыстарын білдіруде. Бұл – балалық шақтың ең шуақты естеліктерінің біріне айналған, балғындар үшін ұмытылмас жаз болды.
Ақерке Амангелдіқызы
Алматы қаласы
BILIM AINASY
