Білім айнасы газеті Республикалық газет 
Ұлағатты ұстаздарымыздың кәсіби мерекесі қарсаңында республикалық «Үздік педагог» конкурсының жеңімпаздарын салтанатты марапаттау рәсімі өтті.
Салтанатты шараға Қазақстан Республикасының Білім және ғылым министрі Асхат Аймағамбетов, Экологиялық ұйымдар қауымдастығының төрайымы Әлия Назарбаева, қоғамдық маңызы бар бастамаларды дамыту қорының өкілдері, Қазақстан Республикасы Парламентінің депутаттары, ЖОО-ның ректорлары, мұғалімдер мен білім беру саласының ардагер-ұстаздары қатысты.
Айта кеткен жөн, 8 жыл ішінде аталған байқауға 35 127 педагог қатысқан, оның ішінде мектепке дейінгі және орта, техникалық және кәсіптік білім беру жүйесіндегі 432 педагог 1000 АЕК көлемінде ақшалай сыйақымен және «Үздік педагог» белгісімен марапатталған.
Өз кезегінде, қоғамдық маңызды бастамаларды дамыту Қорының құрылтайшысы – Әлия Назарбаева «Әлем мұғалімі» сыйлығының іріктеу турында ел намысын қорғайтын он бір мұғалімнің есімін жариялады.
Биылғы салтанатты шараның тағы бір ерекшелігі – байқау жеңімпаздарын құттықтаумен қатар, жеңімпаздардың біріне қоғамдық маңызы бар бастамаларды дамыту қорымен «Қазақстан мұғалімі» сыйлықақысы берілді.
Аталған сыйлықақы Нұр-Сұлтан қаласындағы Дарынды ер балаларға арналған «Білім-инновация» лицей-интернатының математика пәнінің мұғалімі Гул Муаммер мырзаға табысталды.
Сондай-ақ, педагогтарға арналған Нобель сыйлығының баламасы болып саналатын «Әлем мұғалімі» жаһандық премиясының іріктеу турына қатысуға жұмыстары бағытталатын тағы да он ұстаздың есімдері аталды. «Әлем мұғалімі» халықаралық байқауы Дубайда 2020 жылдың наурыз айында өткізілетін болады.
«Білім айнасы» республикалық ғылыми-танымдық басылымының Бас редакторы Қуантай Қатшабаев жеңімпаздарды іріктеу комиссиясының мүшесі болып, конкурсқа қатысушыларды бағалауға зор үлес қосқан еді. Аталмыш шарада басылымның басшысы Қуантай Амантайұлы мен тілші Сәния Құтпанова ҚР БжҒ Министрі Асхат Аймағамбетовтің Алғыс хатымен марапатталды.
Ұлықталған ұстаздарды байқау іріктеуіне «Білім айнасы» басылымы мүшелерінің қатысуын — ұжым еңбегіне берілген зор құрмет, жоғары баға деп білеміз!
Әріптестерімізді зор жетістіктерімен құттықтай отырып, отбасыларына амандық, істеріне ілгерілеу тілейміз!
Гүлжазира ЕРТАСОВА,
«Білім айнасы»,
Нұр-Сұлтан
