Білім айнасы газеті Республикалық газет
Мен үшін жақсы мұғалім бәрінен де артық, өйткені мұғалім-мектептің жүрегі.
Ы. Алтынсарин
Заман талабына сай оқытудың жүйелілік мазмұнының өзгергенін баршамыз жақсы білеміз. Білім беру жүйесінде саналы ұрпаққа, сапалы білім беретін ұстаздар қауымы қызмет атқарып жатыр.
Жаңа білім берудің негізгі мақсаты – білім мазмұнының жаңаруымен қатар, оқытудың әдіс-тәсілдері мен әртүрлі құралдарын қолданудың тиімділігін арттыруды талап етеді. Білім беру бағдарламасын жаңарту критериалды бағалау жүйесі оқушылардың сонымен қоса мұғалімдердің педагогикалық шеберлігін жетілдіру болып табылады. Жаңаша оқытуда педагогиканың барлық аспектілері сындарлы оқытуға негізделген. Осы орайда «Өрлеу» БАҰО» АҚ филиалы «СҚО бойынша ПҚ БАИ» ұйымдастыруымен өткен «Педагогикалық идеялардың панорамасы» бейнесабақтар мен бейнедәрістердің Республикалық байқауының облыстық кезеңінің жеңімпаздарын марапаттау рәсімі өтті.
Республикалық деңгейде өткен бейнесабақтар мен бейнедәрістердің жеңімпаздарының қуанышын бөлісуге, олардың шығармашылықтағы жетістіктерін құттықтауға құрметті қонақтар да келді. Атап айтар болсақ, Петропавл қалалық білім бөлімінің жетекшісі Рамазанова Сара Мироновна, СҚО кәсіпкерлер палатасының бастығы Литвиненко Владимир Викторович, Білім беру саласындағы ақпараттық технология және әдістемелік жұмыс орталығының директоры Саркен Роза Саркеновна, М.Қозыбаев атындағы СҚМУ-дың педагогика факультетінің деканы п.ғ.к., Иманов Амангелді Қалкенұлы, Тіл және әдебиет институтының директоры, ф.ғ.к., Сәбиева Елена Викторовна, «Оқушылар сарайының» директоры Әбілмәжінова Дина Жанзаққызы және т.б. құрметті қонақтар қатысты.
Шындығында, ұстаз дегеніңіз — «өзгенің бақытын аялап, өзінің бақытын аямайтын» асыл да, ардақты жан. Аяулы ұстаздардың шығармашылығы мен кәсіби шеберлігін шыңдайтын аталмыш байқауға облысымыздың барлық аудандарынан 500-ден артық ұстаз қатысып, әрқайсысы жүзден жүйрік атануға лайық болғанын, айтты.
Алғашқы құттықтау сөз «Өрлеу» БАҰО» АҚ филиалы «СҚО бойынша ПҚ БАИ» директоры п.ғ.д., профессор А.Ж.Мурзалиноваға берілді. Алма Жәкімқызы республикадан орын алған жеңімпаздарымызды құттықтап, Өскемен қаласында ашылған «Ұстаздар үйінің» ашылуын барша ұстаздардың алғашқы баспанасы деп, мадақтады. Облыстан шыққан жүйріктер республикада облыс намысын қорғады. Республика бойынша жиырмадан артық номинациядан 4 мұғалім І орын, 3 мұғалім ІІ орын, 5 мұғалім ІІІ орын иеленген.
Республикадан жеңімпаз атанған «Бастауыш сынып» бағыты бойынша І орын Қайсенова Айнұр Сабитқызы, «Қазақ тілі мен әдебиеті» бағыты бойынша І орын Исимбаева Нұргүл Бүркітқызы, «Биология» бағыты бойыныша І орын Кособоков Алексей Владимирович, «Техникалық және кәсіби білім беру» бағыты бойынша І орын Богач Наталья Валерьевна, «Профессорлық-оқытушылық құрам» бойынша І орын Шевелева Наталья Петровна иеленді.
Ұстаздардың биік жетістікке жетуіне себепші болған, «Өрлеу» БАҰО» АҚ филиалы «СҚО бойынша ПҚ БАИ» оқытушыларының да еңбегі орасан. Ұстаздарға әдістемелік, моральдық, рухани көмек көрсетіп, жаңартылған білім мазмұнының жетістіктерін үйретуде үнемі қолдау көрсетіп отыр.
Қазақ «жас келсе іске», дейді. Ұстаздардың қатары жастармен толығып жатқаны, білім беру жүйесіндегі жаңашылдықтың бастамасы.
Кеш соңында республикалық және облыстық кезеңнің жеңімпаздарына дипломдар табысталды. «Педагогикалық идеялардың панорамасы» бейнесабақтар мен бейнедәрістердің Республикалық байқауының облыстық кезеңінің қорытындысын шығаруға қатысқан сарапшыларға сертификаттар беріліп, байқауға қатысқан ұстаздар алғыс хатпен марапатталды.
Көкбасқызы Жазира
«BILIM AINASY»,
СҚО
