Тәуелсіздік – тұғырым!

Хадия Лида,
Астана қаласы әкімдігінің
№76 «Әдемі»  балабақшасы МКҚК
«Ботақан» ересек  тобының тәрбиешісі

Мақсаты: Балаларға Қазақстан Республикасының тәуелсіздік күні туралы түсінік беру; Танымдылық қабілетін арттыра отырып, балаларды ұлттық сезімге баулу; Балаларды Отанын сүюге, ұлтжандылыққа тәрбиелеу.
Көрнекілігі: Рәміздердің суреті, күн суреті, қажетті құралдар, т.б.
Барысы:
Шаттық шеңбер
Ашық болсын күніміз,
Биікте тұрсын туымыз.
Тату-дос боп халықтар,
Бақытты болсын балалар!

Тәрбиеші:— жан ұраным,
Айтар әнім, сөйлер сөзім,
Туған жерім, сағынарым,
Мәңгі бақи шырқалады
Республика ән ұраны.
— Балалар, бүгінгі ұйымдастырылған оқу іс-әрекетін еліміздің әнұранымен бастайық.

Ой-қозғау.
Тәрбиеші: — Балалар, бүгінгі ұйымдастырылған оқу іс-әрекетінің тақырыбы «Менің Отаным — Қазақстан!» деп аталады.
Тәрбиеші: — Балалар, айтыңдаршы «Отан» дегеніміз не? –Иә, бұл сендер тұратын жер, туған үйлерің, халқың. Біздің Отанымыз – Қазақстан. Қане, балалар, Отан туралы кім тақпақ біледі екен?
(балалар Отан туралы тақпақтарын айтады).

Асылым:
Отан деген-атамекен,
Отан деген-туған жер.
Отан-ана, Отан-үлкен,
Қазақстан-туған ел!

Асқар:
Кең жазық Отан мекенім,
Сен де өсіп көктедім
Сені қорғау парызым,
Мұны біліп өтемін.

А.Айлин:
Отаным – қазақ елім, алға ұмтылған,
Өз елімде кезім жоқ сағым сынған.
Шалқыған ел шоқтығын көрсем деймін,
Бәсекелес елу елдің қатарынан.

 Нурали:
Ұлан байтақ жері бар,
Пайдалы қазба кені бар.
Тәуелсіз ел – Қазақстан
Көркіне көркі жарасқан.

Ислам:Тәуелсіз азат елім,
Туып өскен- байтақ жерім.
Мәңгі жайнап тура бер
Қазақстаным менің!

Мариям:
Туған жер – ата қоныс, атамекен,
Бауыры талай жанға болған мекен.
Әр ұлттың басын қосқан бір арнаға
Қазақ елі – ұлы ел, менің өлкем.
Медеу:
Жері кең, сахарадай неткен көркем,
Әлемде 9 санын тұрақ еткен.
Мұнайлы алтын, күміс, жер қойнауы
Мен осы өз өлкемді мақтан етем!

Алим:
Менің туған ауылым,
Туған жерім, мекенім.
Өскен жерім Шоқаным,
Жарқырасын жұлдызың.

Димаш:
Отаным менің – Қазақстан!
Мәңгілік сенімен мақтанам.
Саяңда жүрсем әрдайым,
Күлімдеп жүрем, бақ табам.

Бибі:
Отаным менің – Қазақстан!
Қарызбын саған әрқашан.
Азаматтық борышты,
Өтеуге мәңгі талпынам.

Асима:
Отаным менің – Қазақстан!
Атыңнан сенің айналам.
Бас иіп саған өтемін,
Жасай бер, жаса Қазақстан!

Тәрбиеші: — Ал, енді айтыңдаршы, Егемендігіміздің белгісі нелер?
Балалар: — Рәміздеріміз. Ту, Елтаңба, Әнұран.
Тәрбиеші: -Туда ненің суреттері бейнеленген?
Балалар: -Күн, бүркіт, ою-өрнек.
   

Айым:
Тудың түсі көгілдір. Ортасында күн. Күннің астында қыран құс. Оң жағында қазақтың ою-өрнегі. Мемлекеттік тудың авторы —  Шәкен Ниязбеков.

Тәрбиеші: -Дұрыс. Күн бейбітшілікті, байлықты білдіреді, ал қыран бүркіті – тәуелсіздіктің белгісі. Ою-өрнек  қазақ елінің дәстүрін білдіреді.

Тәрбиеші: — Ендеше өзіміздің жаттаған тақпақтарымызды Тәуелсіздік мерекесіне шашу етіп шашайық.
Адия:Айнымайды   аспаннан,
Біздің тудың бояуы.
Оны халық қашанда,
Биікке іліп қояды.

Алимжан:Арымыздай тап-таза,
Жанымыздай шуақты.
Көтерілді биікке,
Қазақстан байрағы. 

Қ.Аружан:Естісін ел үніңді,
Дүние түгел естісін!
Тәуелсіздік туыңды,
Биік ұста бүлдіршін!

Амир:Зеңгір аспан көгілдір,
Алтын күні төрінде.
Тамылжытып төгіп тұр,
Шаттық сыйлар көңілге.

Медина:Елтаңбамыз ажарлы,
Әнұранымыз әуенді.
Асқақ бола түссін!
Елдігіміздің белгісі!

Адель:Көк аспандай көгілдір,
Қазақстан байрағы.
Нұрын күндей төгіп тұр,
Жылдарымыз жайдары.

Иманғали:Көк байрақтың бетінде,
Қыран бүркіт қанатты .
Сол қырандай еркіндеп,
Бала өседі талапты.

Тәрбиеші: -Ал, Елтаңбадан ненің суреттерін көруге болады?
Балалар: -Пырақ, шаңырақ, жұлдыз, «Қазақстан» деген жазу.
Аяла:Елтаңбаның ортасында шаңырақ. Екі жағында тұлпар, жоғарғы жағында жұлдыз, астында «Қазақстан» деп жазылған. Елтаңбаның авторы —  Жандарбек Мәлібеков. Шота Уалиханов.

Тәрбиеші: -Жұлдыз – жарықты білдіреді, тұлпар – батырлық пен қажырлық нышаны. Шаңырақ – ошақ амандығын білдіреді.
Елтаңба туралы Ерден айтып береді.
Құтты береке шаңырақ
Орын алған ол төрден
Қанатты қос арғымақ
Екі жақтан көмкерген.

Ән: «Елтаңба»
Дидактикалық ойын: Үстел-үсті ойыны: «Асықтар». Додокаэдрмен ойын.
Балаларға «Тәуелсіздік» сөзінің мағынасын түсіндіру.

Ярослав:
Он алтыншы желтоқсан
Тәуелсіздік алған күн!
Ерекше боп мәңгілік,
Ел жадында қалған күн!

 Карим:
Жасай берсін Ұлы күн,
Үміті боп елінің.
Ақ күні боп баланың,
Шаттығы боп атаның

Милана:
Он алтыншы желтоқсан-
Елдің ұлы мейрамы.
Жаңа шыққан көктемдей,
Жаз күніндей жайдары.

Данеля:
Өзіңдікі елің де,
Өзіңдікі Жерің де,
Өзіңдікі өзің еткен бақ,
Тәуелсіздік төрінде!

Т.Айлин:
Мұзға жанған желтоқсанның жалауы,
Құтты болсын Тәуелсіздік мейрамы!
Ол әркімге еркін өмір сыйлайды,
Жақсы атақпен нұр шапағын жинайды.

Н.Аружан:
Өзіңдікі Туың да,
От пен ауа, суың да
Жаса Қазақстаным,
Белді бекем буын да!

Ерасыл:
Сәнді біздің мектебіміз
Жасыл желек көшеміз
Аясында Отанның,
Асыр салып өсеміз

Ержан:
Әйнегі — күн, шатыры — аспан
Кең дала, төсегі толқыған есік.
Көлдері көкке күмістер шашқан,
Қазақстан — Республикам менің!
Сергіту сәті:
Қане, қане тұрайық,
Киіз үйді құрайық.
Бір уықты қолға алып,
Шаңыраққа қадайық.
Оңға, солға бұрылып,
Арқандарды тартайық.
Би: «Шайға шақыру биі»

Мадақтау:
Ұйымдастырылған оқу іс-әрекетіне белсене қатысқан балаларды  мадақтау. Қорытындылау: осындай Тәуелсіз Қазақстан елінде тату-тәтті ғұмыр кеше берейік дей келе, бүгінгі  ұйымдастырылған оқу іс-әрекетін аяқтаймыз.

Хормен:
Жақсыдан үйренейік,
Жаманнан жиренейік!
Еліміздің ең ақылды, ең білімді, ең бақытты азаматы болайық!
Тәрбиеші: — Балалар жарайсыңдар! Өздерің Отандарыңды қалай сүйетіндеріңді дәлелдеп бердіңдер! Осылай еліміз, жеріміз гүлдеп, жайнай берсін!