Білім айнасы газеті Республикалық газет 
Ел Тәуелсіздігінің 25 жылдығы және қазақтан шыққан тұңғыш математика профессоры Әлімхан Ермековтің 125 жылдық мерейтойы аясында Қарағанды қаласында ұйымдастырылған математикадан Ә.Ермеков атындағы республикалық олимпиаданың жабылуы мен жеңімпаздарды марапаттау рәсімі салтанатты жағдайда өтті.
Шәкірттер сайысы Қарағанды мемлекеттік техникалық университетінің ғимаратында өткізілуінде де мән бар. Техникалық білімнің алтын ұясында кезінде Әлімхан Ермеков ұстаздық қызметпен шұғылданған.
– Әлімхан Әбеуұлы біздің университетімізде сталиндік қуғын-сүргін кезеңінде, әйгілі 58-бап бойынша лагерьде отырып келгеннен кейін еңбек еткен, – деді ҚарМТУ-дың ректоры, академик Арыстан Ғазалиев. – Ол өзінің сенімі үшін жазықты болған адам еді. Біле білсеңіздер, Қазақстанның қазір жер көлемі бойынша әлемдегі 9-шы ел болып отырғаны – сол кісінің арқасы. Әлбетте, ол кісінің ғылымға сіңірген еңбегі де орасан. Қазақ тілінде жазылған тұңғыш математика оқулығының авторы. Сол кітаптың бір данасы қазір ҚарМТУ мұражайында сақтаулы. Ермековтер әулетінен 4 ғылым докторы, 3 академик шыққан. Олар да атақты ғалымдар, Қазақстан үшін көптеген игі істер тындырған тұлғалар.
Олимпиадаға еліміздің барлық облыстарынан 8-9 сыныптарда оқитын 115 дарынды жеткіншек қатысты. Екі тур бойынша өткен бәйгеде жас математиктер күрделі математикалық есептер шешу бәсекесіне түсті. Сонымен қатар, білім сайысының шеңберінде оған қатысушылар үшін мәдени-сауық бағдарламалары мен тренингтер ұйымдастырылды.
Ә.Ермеков атындағы білім додасының түпкі мақсаты оқушылардың шығармашылық қабілетін дамыту, практикалық дағдылары мен теориялық білімдерін тереңдету, дарынды балаларды анықтауға жағдай жасау, оқушыларды математикадан халықаралық жарыстарға дайындау, сол арқылы еліміздің білім дәрежесін көтеру болатын.
Олимпиаданың жабылу салтанатында жеңімпаздар мен жүлдегерлер медаль-дипломдармен, бағалы сыйлықтармен марапатталды. Гран-при жүлдесіне Астана қаласы қазақ-түрік лицейінің 12 жасар оқушысы Данат Дүйсембеков ие болды. Оған Қарағанды облысының әкімі Нұрмұхамбет Әбдібеков арнайы тағайындаған 250 мың теңге ақшалай сыйлық табыс етілді. Сонымен қатар, жүлделі орындарды еншілеген 12 шәкірт пен белгілі ғалымдар атындағы арнайы сыйлыққа ие болған балаларға да бағалы тартулар жасалды.
– Осы олимпиаданың өтетіні туралы кештеу естідім де, дайындыққа уақытым аз болып қалды. Сонда да келіп қатысып, жеңімпаз атанып отырмын. Бұл білім сайысы маған ұнады: тапсырмалары қызықты, бәсекелестерім де мықты екен. Жүлдеге алған қаражатты ата-анама апарып беремін, мүмкін маған ноутбук алып беретін шығар, – дейді қаршадай дарын.
Елімізде өскелең ұрпақтың ынтасын оятып, ертеңгі күннің игілігіне қызмет ететін тағы бір бастама өмірге келді. Олимпиаданы ұйымдастырған Білім және ғылым министрлігі, «Дарын» республикалық ғылыми-тәжірибелік орталығы, Қарағанды облысының жастар саясаты мәселелері жөніндегі басқармасы өкілдерінің айтуынша, бұл бастама енді жыл сайын өткізіліп, дәстүрлі білім бәйгесіне айналмақ.
