Білім айнасы газеті Республикалық газет 
Альджанова Нурлыхан Кожаберовна
Дінтану және мәдениеттану кафедрасы
Әл-Фараби атындағы ҚазҰУ
9 мамыр күні Әл-Фараби атындағы Қазақ ұлттық университеті Философия және саясаттану факультеті Дінтану және мәдениеттану кафедрасының доценті, философия ғылымдарының докторы Бейсенов Бағдат Қайбылдаұлы қайтыс болды.
Бейсенов Бағдат Қайбылдаұлы еңбек жолын жұмысшы болып бастаған, ол әл-Фараби атындағы Қазақ ұлттық университетінің философия бөлімінің түлегі (философия баклавры-1996 ж., философия магистрі-1998 ж.). 1998-2000 жылдары әл-Фараби атындағы ҚазҰУ-нің философия және саясаттану факультетінің аспиранты. 2001-2010 жылдары ғылым философиясы және дінтану кафедрасының ассистенті, оқытушысы, аға оқытушысы, доценті қызметін атқарып келді. 2002 жылы 09.00.03 – философия тарихы мамандығы бойынша «Мәшһүр Жүсіп Көпейұлының әлеуметтік философиясы» тақырыбында кандидаттық диссертация қорғады.
2004 ж. мемлекеттік «Мәдени мұра» бағдарламасына аудармашы ретінде қатысты, жеке жазылған 1, қосавторлықта дайындалған 5 оқу құралы, 70-ден астам ғылыми мақала, типтік бағдарламалары бар.
2010 жылы 09.00.13 – дінтану, философиялық антропология, мәдениет философиясы мамандығы бойынша «Қазақ руханиятындағы ислам құндылықтары» атты докторлық диссертациясен табысты қорғады.
ҚР БҒМ тарапынан бөлінетін іргелі жобаларда: «Ұлттық қауіпсіздік аясындағы діни айқындалу мәселесі» (2007-2009 жж.), «Ұлттық идея аясындағы Қазақстандағы діндер» (2008 ж.), «Қазіргі замандағы діннің рөлі» (2011 ж.) ғылыми қызметкер ретінде ғылыми зерттеулермен айналысты.
Бейсенов Бағдат Қайбылдаұлы факультет пен кафедра тарапынан тапсырылған қоғамдық жұмыстарды жауапкершілікпен, уақытында атқарды, дінтану және мәдениеттану кафедрасында кәсіби бағдар жұмысына жауапты болды. Ғылыми-зерттеу жұмысын ұстаздық қызметпен сабақтастыра білетін, жауапкершілікті, әріптестері арасында құрметке ие қызметкер болды.
Әл-Фараби атындағы Қазақ ұлттық университеті Философия және саясаттану факультеті, Дінтану және мәдениеттану кафедрасының ұжымы философия ғылымдарының докторы Бейсенов Бағдат Қайбылдаұлының қайтыс болуына байланысты марқұмның отбасы мен туыстарына қайғырып, көңіл айтады.
