Абай Құнанбайұлының 175 жылдығына арналған

Альжанова Дана Қабылкешқызы
Нұр-Сұлтан қаласы
Шейх Тамим бен Хамад әл-Тани атындағы
№85 мектеп-лицейінің
    қазақ тілі мен әдебиеті пәнінің мұғалімі,
педагог-зерттеуші

«Өлең – сөздің патшасы, сөз сарасы…»

атты әдеби-музыкалық байқауы

Мақсаты: Оқушыларды ұлы ақынның өнегелі өмірімен таныстыру, ақынның даналығын, рухани асыл-мұраларын насихаттап, өлеңдерін, қара сөздерін, әндерін мәнерлеп айтқызу. Көркем сөйлеуге, шығармашылықпен жұмыс істеуге баулу.

Көрнекіліктері: Абай портреті, эпиграф жазылған плакаттар, кітап көрмесі, слайдтар, шарлар, балдық житондар, музыка.

Жүргізуші (Альтаир):  — Жантөре, сен білесің бе, менің барлық сабақтарым «5» қой!

Жүргізуші (Жантөре): Қазақ тілден де ме?

Жүргізуші (Альтаир):  Иә, мен БЖБ-дан барлық сұрақтарға дұрыс жауап бердім ғой!

Жүргізуші (Жантөре): Ал, мен, білесің бе, минутына қанша сөз оқитынымды?

Жүргізуші (Анна): Ұлдар, ұлдар, тоқтаңдар, «Ғылым таппай, мақтанба! Орын таппай баптанба» деген Абай атамыздың сөздері бар емес пе? Және сайысымызды бастамаймыз ба?

Жүргізуші (Жантөре): Дұрыс айтасың, Анна!

Жүргізуші (Альтаир): Иә, ең алдымен, көрермендермен амандасып алайық! Армысыздар, құрметті әдебиет сүйер қауым!

Жүргізуші (Анна): Сәлеметсіздер ме, қадірменді ұстаздар мен қонақтар!

Жүргізуші (Жантөре): Қайырлы күн, қымбатты оқушылар!

Жүргізуші (Анна):

Көп адам дүниеге бой алдырған,

Бой алдырып, аяғын көп шалдырған,

Өлді деуге бола ма, ойлаңдаршы,

Өлмейтұғын артына сөз қалдырған, – деп төрелігін өзі шешкен Абай атамыз бүгін жарқын бейнесімен де, жалынды жырымен де бізбен бірге                     175 жыл бойы өмір сүріп келеді, мәңгі өмір сүре бермек!

Жүргізуші (Жантөре): Ол өткен заманның, кешегі түркі дүниесінің соққан тынысы болса да бізге түсінікті, жүрегімізге қонымды Абай – лебі, Абай – үні, ана тынысы – заман тынысы, халық үні. Абайдың жарқын бейнесі, жалынды жыры бізбен бірге мәңгі жасап келеді.

Жүргізуші (Альтаир): Қазақтың бір туар ұлдарының бірі, данышпан ақын, ойшыл, дана ғұламаларының бірі, қазақ әдебиетінің шоқтығы биік ірі тұлғасы Абай Құнанбайұлының шығармашылығына арналған 2- сыныптары арасындағы «Өлең – сөздің патшасы, сөз сарасы…» атты әдеби-музықалық сайысымызға  қош келдіңіздер!

Жүргізуші (Анна): Сайысымыздың ережесімен таныс болыңыздар! Сайыс 3 номинация бойынша өтеді:

• «Жүрегін шырақ етіп жандырған,

Жырымен жан сусынын қандырған» атты көркемсөз оқу шеберлігін сынау. (Мәнерлеп оқу сайысы)

Жүргізуші (Жантөре):

• «Құлақтан кіріп, бойды алар, әсем ән мен тәтті күй…» атты ән айту сайысы

Жүргізуші (Альтаир):

• Абайдың қара сөздеріне негізделген көрініс қою немесе мәнерлеп оқу сайысы.

Жүргізуші (Анна): Олай болса, сайысымызды бастамас бұрын көрермендерді әділқазылар алқасымен таныстырайық:

1. ______________________________________
2. ______________________________________
3. ______________________________________
4. ______________________________________
5. ______________________________________

Жүргізуші (Жантөре):  Әр номинацияның ең жоғары баллы – 3

Жүргізуші (Альтаир): Онда, достар, бүгінгі кешімізге дайынсыздар ма? Бастайық!

Сахнада  2 «Ж», «З», «И», «К», «Л», «М», «Н», «О», «П» сынып оқушылары (әр сыныптан Абай Құнанбаевтың 1өлең, 1 қара сөз, 1 ән) өнерлерін көрсетеді.

Жүргізуші (Альтаир): Осымен барлық сынып оқушылары өз өнерлерін көрсетіп шықты, әділқазылар алқасы  өз ойларын түйгенше, алдарыңызға               2 «Л» сыныбының оқушысы, халақаралық сайыстарының жеңімпазы Ашимов Асаналидің өнерін тамашалайық

Жүргізуші (Жантөре):

Ендігі сөз кезегін әділқазылар алқасына берейік!

Жүргізуші (Анна):  Абай қазақ поэзиясының өсіп, гүлденіп, жаңа сапаға жетуіне орасан зор еңбек етті. Ақын жас ұрпаққа терең ойға толы алуан өлеңдер үлгісін қалдырды. Абай Құнанбайұлының 175 жылдығына орай дайындалған «Өлең – сөздің патшасы, сөз сарасы…» атты әдеби-музықалық сайысымызды көріп тамашалағандарыңызға алғысымыз мол!

Жүргізушілер: Қатысушыларға үлкен рахмет!