Тәуелсіздік мәңгілік!

Тәуелсіздік — көзімнің қарашығы,
Сонда менің жанымның бар асылы,
Бабамның ғасырлардан жеткен мұңы,
Арманы, қан мен тері, жан ашуы.

Атыңнан айналайын, Азаттығым,
Сен барда атқан таңым ғажап бүгін.
Сен барда жұтқан демім — тау самалы,
Сен жоқта әр минутым азап-тұғын.

Дербеспін, мен ойымды айта аламын,
Сөзім азат болса тек жай табамын.
Қыстығып, қаймықпаймын бұрынғыдай,
Жоқты тауып, кеткенді қайтарамын.

Өшкен жанып, өлгенім тірілгендей,
Бақытты жан бар ма екен бүгін мендей?!
Құшақ жайып, ақылман сөз айтқанда,
Әлем келіп алдыма жүгінгендей!

Ойым — орман, сөзім — шың, тым биікпін,
Мұңым — мұхит, қайғым — көл, тұңғиықпын.
Қасарысқан жауыма — қарсы жебе,
Құшақ жайған бауырды шын сүйіппін.

Бостандығым, бақытым, тәжім менің,
Жан жайлауым, рахатым, жазым менің,
Көсілейін, шабайын, кең даламда,
Тарқатып, жан жарасын, әжімдерін.

Сайын дала, сар дала, абыз далам,
Нелер сойқан көрмеді аңыз далам?!
Оқ тиді, қылыш кесті, сойыл соқты,
Ордамды ойран етті жауыз ғалам…

Мың өліп, мың тірілген, қайран бабам,
Сын сәтте жанын бағып ойланбаған,
Ары — оның жаннан қымбат жауһар еді,
Ту қылып алып шықты майданда аман.

Ал, бүгін, мен күлемін, шаттанамын,
Тәуелсіздік, атыңмен мақтанамын!
Саған сызат түсіріп алмас үшін,
Жалаң қолмен жауға да аттанамын!

Уа, Азаттық, Бостандық, Еркіндігім,
Қазақстан — жерұйық, жер кіндігі!
Тәуелсіздік — о, менің жәдігерім,
Аспанға атар бар қазақ бөркін бүгін!

Астана қаласы
Аңсаған Талғатқызы