ҰЛТТЫҚ ОЙЫНДАРДЫ ҰТЫМДЫ ПАЙДАЛАНҒАН «АҚҚАНАТ»

Мемлекет басшысының «Болашаққа бағдар: рухани жаңғыру» атты бағдарламалық мақаласы – ел дамуының жарқын үлгісі мен нақты қадамдарын көрсететін маңызды құжат екені мәлім. Халық тарапынан қызу қолдау тапқан аталмыш тұғырнаманы жаңа тарихи кезеңге аяқ басқан Тәуелсіз Қазақстанның жаһандану дәуіріндегі рухани кеңістігіміздің бастауы деп бағалауымыз керек. «Ұлттың рухани коды» дейтін академиялық ұғым ұлт көшбасшысының ой-санасында бірнеше рет елекке түсіп, таразыға тартылған, сан жылдардан бері сарапталып, пісіп жетіліп, өзінің сын сағатын күтіп келген дүние екені даусыз.

Мақалада көрініс тапқан Елбасының келелі ойы, салиқалы пікірі бірінші кезекте жас ұрпаққа арналды. Жаһандық бәсекеге төтеп беру жолында ұлттық құндылықтарды дәріптеу, сананы жаңғыру, патриот азаматтарды тәрбиелеу бағытында алға қойған мақсаттар мен міндеттерді әрбір жастың жүрегіне жеткізу – кезек күттірмес міндет екені айқын.
Осыған орай үстіміздегі жылдың 22 ақпанында Астана қаласы әкімдігінің №59 «Аққанат» балабақшасы МКҚК «Қазақ ұлттық ойындарын пайдалану арқылы мектеп жасына дейінгі балалардың зияткерлік дамуы» атты қалалық семинар-практикум өткізді.

Балабақшаның оқу-тәрбие жұмыстарында қазақтың ұлттық ойындарын тиімді қолдана отырып, балалардың ойлау қабілеттерін, тілді дамыту мен ой-өрісін кеңейтуді мақсат еткен семинарға Астана қаласындағы №54, №57, №89, №80 сынды ауқымы кең балабақша меңгерушілері мен әдіскер-тәрбиешілері және ата-аналар қауымы, сондай-ақ балабақша бүлдіршіндері қатысты.
Шараның шымылдығын ашқан «Аққанат» балабақшасының меңгерушісі Гүлмаржан Қуанышқызы Кланова семинар-тренингте ұлттық ойындарға басымдық бере отырып, мектеп жасына дейінгі балалардың зияткерлік дамуына ықпал ететін біршама дүниелерді қатысушылар назарына ұсынатындығын атап өтті.
Шара эксперимент алаңы бойынша технология авторы Н.А. Оразахынованың алғы сөзімен жалғасын тапты.
«Сатылай кешенді оқыту технологиясымен ұлттық тәрбие беру жолдары» бойынша аталмыш балабақшаның мектепалды даярлық тобы тәрбиешісі А.Б. Ибраева өзінің тұшымды ой-пікірімен бөлісті.

Елбасымыз Н.Ә. Назарбаев өзінің аталмыш мақаласында: «Мен халқымның тағылымы мол тарихы мен ықылым заманнан арқауы үзілмеген ұлттық салт-дәстүрлерін алдағы өркендеудің берік діңі ете отырып, әрбір қадамын нық басуын, болашаққа сеніммен бет алуын қалаймын», — деген болатын. Осы талап аясында «Аққанат» балабақшасы аянбай еңбек еткенінің айқын куәсі болдық. Балабақша ұжымының ұйымдастырған ойын түрлері осы сөзімізге дәлел бола алады.

Семинардың «Ұрпаққа аманат» бөлімі бойынша тәрбиешілер Г.А. Нурмашева мен А.Б. Ибраева ұлттық ойын түрлерін көпшілік назарына ұсынып, қызықты сайыс ұйымдастыра білді. «Асық ату», «Соқыр теке», «Сақина салу», «Орамал салмақ» сынды ұмыт бола бастаған ұлттық ойындарға белсене араласып, шапшаңдық пен білгірлік танытқан ата-аналардан құралған топ мүшелеріне балабақша тарапынан Алғыс хат тапсырылды.
«Тілім менің – тірлігімнің айғағы» зияткерлік ойынын ұйымдастырған тәрбиеші А.Е. Рысбекова ата-аналардан құралған екіге бөлінген топқа жұмбақ жасырып, жаңылтпаш айттырып және әрбір заттың үш тілде аталуын қадағалады.

Балабақша психологі М.Боранбаеваның ұйымдастырған «Көңілді әткеншек құрастыру ойыны» атты бөлімде топ-топқа бөлінген команда мүшелеріне пазл құрастыру арқылы, жылдамдық пен фантазия бойынша жүлде тағайындады.
Музыка жетекшісі Б.Жұмабайдың жетекшілігімен көпшілік көңіліне ұсынылған балалардың концерттік бағдарламасы жиналған қауымға тың серпін, көтеріңкі көңіл-күй сыйлады.
Гүлмаржан Қуанышқызы басшылық ететін балабақша ұйымдастырған семинар-тренинг соңы рефлексиямен (талдау жасау және пікір алмасу) жалғасты. Қорытындылай келе, семинар-тренингке қатысушылар өздеріне категориялар бойынша қажетті кеңестер мен тиімді толық ақпарат алып, өз алғыстарын білдірді.
Семинар барысында балабақша қызметкерлерінің жаңашылдыққа, ізденімпаздыққа, үздіксіз білім алып, инновациялық әдіс-тәсілдерін тәжірибелеріне енгізе отырып, еңбектенуге деген көзқарастары мен олардың өз кәсібіне деген ынтасын, құлшынысын байқап, көңілге қуаныш ұялаттық.
Балапандарын ұясынан ұшырғалы отырған «Аққанаттықтарға» қанаттарыңыз талмасын дейміз!

Гүлжазира ЕРТАСОВА,
Қазақстан Журналистер одағының мүшесі,
«Білім айнасы»