Білім айнасы газеті Республикалық газет 2018 жылдың 15 желтоқсан күні Т.Рысқұлов ауылы, Жанкент мөлтек ауданында орналасқан «Жанкент» спорт кешенінде Қазақстан Республикасы Тәуелсіздігінің 27 жылдығына арналған аудан орталығындағы мемлекеттік балабақшалар арасында «Көңілді старт» атты достық эстафеталық сайысы өтті. Сайысты ұйымдастырушылар Түлкібас ауданының білім бөлімі, аудандық дене шынықтыру және спорт бөлімі және «Таңшолпан» бөбекжайы.
Спорттық іс-шараның ашылу салтанатында «Таңшолпан» бөбекжайының меңгерушісі Нованқызы Фарида құттықтау сөз сөйлеп, шараны ашық деп жариялады. Сонымен қатар аудандық білім бөлімінің әдіскері Абилов Жұмабек іс-шараға жиналған командаларды және жанкүйерлерін Тәуелсіздік күнімен құттықтап, сайысқа қатысушы командаларға сәттілік тіледі.
Іс-шара балабақша қызметкерлері арасында салауатты өмір салтын дәріптеу, патриотизмді, достықты, бірлікті, ынтымақтастықты насихаттау мақсатында ұйымдастырылды. Аталған іс-шараға «Таңшолпан», «Балапан», «Балдырған» балабақшаларының спорттық командалары қатысты. Сайыстың адал өтуін қадағалап, әділ шешімін шығару АББ-нің бұйрығымен бекітілген төрешілер алқасына жүктелді. Эстафеталық сайысты «Таңшолпан» бөбекжайының дене тәрбиесі нұсқаушысы Уристембеков Мақсат жүргізді.
Эстафеталық ойындар 9 кезеңнен тұрды. 1. Таныстыру. 2. Эстафета. 3. Достық. 4. Көңілді скейтборд. 5. Баскетболшы өрмекші. 6. Кенгуру. 7. Туннель. 8. Секіргіш. 9. Арқан тартыс. Сонымен қатар сайысқа қатысушы әр команда тәуелсіздік күніне арналған флешмоб биледі. Сайыс өте тартысты әрі қызықты өтті. Сайыс қорытындысы бойынша «Балапан» бөбекжайы І орын, «Таңшолпан» бөбекжайы ІІ орын, «Балдырған» балабақшасының спорттық командалары ІІІ орынды иеленді. Спорттық сайысқа қатысушы командалар аудандық дене шынықтыру және спорт бөлімінің грамоталарымен және «Таңшолпан» бөбекжайының бағалы сыйлықтарымен марапатталды.
Курпеева Айгүл
«Таңшолпан» бөбекжайының әдіскері
