Білім айнасы газеті Республикалық газет Бүгінгі күні білім саласына енгізіліп жатқан өзгерістер алдында білімді дайын күйінде ұсынып қоймай, шығармашылық бағытта жұмыс істейтін, тың жаңалықтар ашатын, біртума ойлау қабілетімен ерекшеленетін шығармашыл тұлғаны тәрбиелеу міндеті тұр.
Қазіргі мұғалімнің басты қызметі – білім беру мен жеке тұлға тәрбиесін сабақтастыру болса, оқушылармен ғылыми-зерттеу жұмыстарын жүргізу арқылы олардың шығармашылық, ізденімпаздық қасиеттерін дамыту болып табылады. Сондықтан мұғалім оқушының қабілеттерін дамыту, талантты балалардың талабын ұшқырлау мақсатында заман талабына сай, оқушының шығармашылық іс-әрекетіне жағдай жасау керек. Оқушының шығармашық іс — әрекетіне жағдай тудыру дегеніміз – оқушыны ойлай білуге үйрету екені сөзсіз.
Осыған орай «Өрлеу» біліктілікті арттыру ұлттық орталығы» АҚ филиалы Жамбыл облысы бойынша педагогикалық қызметкерлердің біліктілігін арттыру институтының ұйымдастыруымен белсенді, шығармашыл оқушылар арасында қашықтан «Ұстазым, мені шығармашылыққа шабыттандыр» тақырыбында Республикалық эссе байқауы өтті. Байқау шығармашыл оқушыларды анықтау, озық идеяларды іздеу, тұлғаның ішкі әлеуетін дамытуға ықпал ету мақсатында ұйымдастырылды. Байқау тақырыбы ізгілік педагогикасының көрнекті өкілдерінің бірі Ш.А.Амонашвилидің еңбектерінің бірі негізінде алынды. Оқушылардың шығармашылық қабілеттерін шыңдауда ізгі педагогтің бұл шығармасы шабыт беріп, ойына қозғау салады деген сенім болды.
Байқау жұмысына республикамыздың барлық аймақтарынан 300 жуық оқушылар ат салысып, өздерінің эссе жұмыстарын ұсынды. Эссе жұмыстарында бірі өздерінің алғашқы ұстаздары туралы жазып өтсе, келесілері шабыттандырушы ұстаздары туралы ой қозғаған. Енді бірі ұстаздарының берген шабытты әрекеті арқылы өздерінің шығармашылық әрекеттерінің негізінде жеткен жетістіктері туралы жазған. Алдағы уақыттарда өткізілетін осындай іс-шаралардан дарынды, шығармашыл, белсенді жастарды күтеміз.
Абдикеримова Назира Жорабекқызы
педагогика ғылымдарының магистрі
«Өрлеу» БАҰО» АҚ филиалы Жамбыл облысы бойынша педагогикалық қызметкерлердің біліктілігін арттыру институты
Деңгейлік бағдарламалар орталығының
«Өзін-өзі тану» пәні бойынша тренері
