РУХАНИ ЖАҢҒЫРУ – КЕМЕЛ КЕЛЕШЕК КІЛТІ

Мемлекет басшысының «Болашаққа бағдар: рухани жаңғыру» атты бағдарламалық мақаласы — ел дамуының жарқын үлгісі мен нақты қадамдарын көрсететін маңызды құжат екені мәлім. Халық тарапынан қызу қолдау тапқан аталмыш тұғырнаманы жаңа тарихи кезеңге аяқ басқан Тәуелсіз Қазақстанның жаһандану дәуіріндегі рухани кеңістігіміздің бастауы деп бағалауымыз керек. «Ұлттың рухани коды» дейтін академиялық ұғым ұлт көшбасшысының ой-санасында бірнеше рет елекке түсіп, таразыға тартылған, сан жылдардан бері сарапталып, пісіп жетіліп, өзінің сын сағатын күтіп келген дүние екені даусыз.

Мақалада көрініс тапқан Елбасының келелі ойы, салиқалы пікірі бірінші кезекте жас ұрпаққа арналды. Жаһандық бәсекеге төтеп беру жолында ұлттық құндылықтарды дәріптеу, сананы жаңғыру, патриот азаматтарды тәрбиелеу бағытында алға қойған мақсаттар мен міндеттерді әрбір жастың жүрегіне жеткізу – кезек күттірмес міндет екені айқын.

Осыған орай, Елбасының бағдарламалық мақаласын жастар арасында кеңінен түсіндіру мақсатында ағымдағы жылдың 19-ақпанында Л.Н. Гумилев атындағы Еуразия ұлттық университеті Журналистика және саясаттану факультетінің деканы, профессор Қайрат САҚ Елордамыздағы №15 мектеп-лицейде кездесу өткізді. Бауыржан Қапарұлы басшылық ететін білім ошағында өткен жиынға мектеп директорының тәрбие ісі жөніндегі орынбасары Ғалия Омашева мен бірнеше пән мұғалімдері, сынып жетекшілері мен 8-11 сынып оқушылары қатысты.

Кездесу барысында Қайрат Өмірбайұлы өскелең ұрпаққа рухани жаңғырудың мән-мағынасын, жаңғыру процесінің нақты мақ­сат-міндеттерін, басымдықтары мен оған жет­кізетін жолдарын түсіндірді. Сондай-ақ, елбасының мықты, әрі жауапкершілігі жоғары біртұтас ұлт болуы үшін болашаққа қалай қадам басу керектігі мен бұқаралық сана­­ны қалай өзгерту қажеттігі жайлы көзқарастарымен бөлісті.

Ұлттық жаңғыру деген ұғымның өзі ұлттық сананың кемелденуін білдіретінін ұғындырған ұстаз ұлттық кодты құрайтын ұлттық тарихымыз, ұлттық мәденитіміз, салт-дәстүріміз және әдет-ғұрпымыз хақында да кеңірек әңгімеледі.

Елбасымыздың «Қазір бой жарыстыратын заман емес, ой жарыстыратын заман» деген сөзін тілге тиек еткен Қ.Ө. Сақ оқушыларға табысты болудың ең іргелі, басты факторы — білім екенін баса айтты. Білім салтанат құрған заманда білімді бәрінен биік қоятын ұлт қана табысқа жететінін егжей-тегжейлі түсіндірді.

Мәңгілік Ел мұратын жүзеге асырудың түп негіздерін көрсетіп берген тұжырымдамалық бағдарламаның бір тармағы – латын әліпбиі мәселесіне де тарихқа шегініс жасау арқылы терең тоқталды.
Тарихы тым тереңнен тамыр тартқан әліпбиімізді латыншаға көшіру — бұл қазіргі заманғы технологиялық орта­ның, ком­муникацияның, сондай-ақ, ХХІ ғасыр­дағы ғылы­ми және білім беру процесінің ерекше­лік­теріне байланысты екенін жас ұрпаққа жете түсіндірді.
— Мектеп қабырғасында ағылшын тілін оқып, байланыс құралдарын ағылшын тілінде пайдаланып жүрген өздеріңдей жас буын үшін латын әліпбиіне көшу ешқандай қиындық, кедергілер келтірмейді, — деді Қайрат Сақ мырза.

Елбасымыз айтқандай, «Еліміздің болашағы — жастардың қолында» екендігін жас ұрпақтың бойына сіңірген тағылымды дәрісті зор ынтамен тыңдаған қазақ және орыс сыныптары топтастырылған аталмыш мектеп оқушылары Қайрат Өмірбайұлына тақырып аясында бірнеше сауалдарын жолдады.

Келелі кездесу барысында жас ұрпақ жаңғыру жөніндегі осынау ұсыныстардың маңы­зын терең түсініп, қолдау білдіргені көңілге қуаныш ұялатады.

  Гүлжазира ЕРТАСОВА,
«Білім айнасы»