Білім айнасы газеті Республикалық газет Мақсаты:
Білімділік: ойыншықтардың атын, түсін қандай заттан жасалғанын, жекеше, көпше атауларын үйрету.
Дамытушылық: балаларды сөзді анық айтып, дұрыс сөйлей білуге баулу, сөздік қорларын дамыту.
Тәрбиелік: олармен қалай ойнау керектігін түсіндіріп, ұқыптылыққа, эстетикалық талғамдарын кеңейту, талдау, әдемілікке тәрбиелеу.
Көрнекіліктер: доп, қуыршақ, жұмсақ ойыншықтар, матадан жасалған ойыншықтар.
Іс-әрекет бөлімдері:
Тәрбиешінің әрекеттері. Балалардың әрекеттері.
Ұйымдастырушылық-оятушылық.
Шаттық шеңбері: Балалар шаттық шеңберін құрып, бір-біріне жылы тілектер білдіреді.
Армысың, жарқыраған күн,
Армысың, Жер-ана!
Армысың, көгілдір аспан.
Армысың, апайлар,
Армысың, сен және мен.
Ұйымдастырушылық-ізденушілік.
— Балалар, қараңдаршы, біздің тобымызда ойыншықтар өте көп, олар қандай әсем, әдемі ойыншықтар.
— Балалар, мынау қандай ойыншық?
— Доптың пішіні қандай?
— Түсі қандай?
— Доптың қимылы қандай?
— Кәне, бәріміз допша секірейікші. Кім доп туралы тақпақ біледі?
Добым менің домалақ,
Тоқтамайсың домалап,
Үстел үстін бүлдірдің,
Тәрелкені сындырдың.
Тентек болып кеттің деп,
Тұрмыз сені тепкілеп.
Тәрбиеші:
— Қыз балалар көбіне қандай ойыншықпен ойнайды?
— Қуыршақпен.
— Дұрыс айтасыңдар. Ал, мына қуыршақ бізбен амандасқысы келіп тұр. Балалар, қуыршақтың әдемі шашы, әдемі көйлегі бар екен.
— Қуыршақтың көйлегінің түсі қандай?
— Қуыршақ қалай жүреді?
— Ал ұлдар көбінесе қандай ойыншықпен ойнайды?
— Машинамен ойнайды.
— Ал машинаның түсі қандай?
— Кім машина туралы тақпақ біледі?
— Сендердің үйлеріңде қандай ойыншықтарың бар? (Балалардың жауабы).
— Ойыншықтар жасалуына байланысты бірнеше түрге бөлінеді.
— Жұмсақ, қатты, резиналы.
Көрмеге темірден, ағаштан, пластмассадан және матадан жасалған ойыншықтар қойылады.
— Бір ойыншықты біз ойыншық дейміз. Ал көп ойыншықты қалай атаймыз? (Балалардың жауабы).
— Балалар, біз бұл ойыншықтарды қолымызбен ұстап, сипау арқылы оларды қандай екенін білеміз. Балалар, кәне, есімізге түсірейікші, ойыншықтар қандай заттардан жасалады?
- Матадан жасалған.
- Пластмассадан.
- Резинадан жасалған. (Сипаттама беру).
— Өте жақсы, балалар, сендердің көмектеріңмен барлық ойыншықтар өз аралдарын тапты.
Күлдірген: Балалар, қандай керемет, сендер барлық ойыншықтарды өз аралдарына орналастырдыңдар. Балалар, сендер тапқыр, білімді екенсіңдер, мен сендерге ойын алып келдім.
Ойын: «Ғажайып қоржын».
Ойынның шарты бойынша көздеріңді жұмып, қоржыннан кез келген ойыншықтарды аласыңдар. Алған ойыншықтарыңның атын, неден жасалғанын, түсін, қатты, жұмсақ екенін айтып, жақсы мейірімді тілек білдіресіңдер.
Мысалы:
— Мен ойыншықты сындырмай таза ұстаймын.
— Ол менің сүйікті ойыншығым болады.
— Балалар, «ойыншық» деген сөз қандай әріптен басталады?
— «О» әрпінен басталады.
— Дұрыс айтасыңдар. Ал, «қуыршақ» ше?
— «Қ» әрпінен басталады.
— Доп деген «Д»- әрпінен басталады.
Күлдірген: Жарайсыңдар, балалар, мен сендерге ризашылығымды білдіріп, ойыншықтарыңды ұқыпты ұстауға тілектеспін. Сау болыңыздар! Балалар Күлдіргенмен қоштасады.
Енді сергіту жаттығуларын жасаймыз:
Жел уледі: у-у-у,
Құйын келіп биледі: зу-зу-зу,
Қатты, қатты жел соқты: гу-гу,
Жапырақтар қол соқты, ду-ду,
Шыдай алмай жапырақтар, ах-ах,
Билеп кетті қалтырап, пах-пах.
Рефлексивті кезең:
— Бүгін біз не істедік?
— Нені білдік?
— Бізге кім қонаққа келді?
— Балалар, біз бүгінгі іс-әрекетімізде нелер туралы әңгімеледік?
(Балалардың жауаптары).
Күтілетін нәтиже:
Нені біледі: ойыншықтарды.
Қандай түсінікті игереді: ойыншықтарды, оларды топтастыруды.
Меңгерген дағдылары: ұқыптылыққа, достыққа, тазалыққа, әдемілікке, байланыстырып сөйлеуге дағдыланды.
Хайруллаева Юлдуз Фархадовна
«Балапан» бөбекжай-балабақшасының
ІІ-санатты тәрбиешісі
ОҚО, Кентау қаласы, Қарнақ ауылы
