Білім айнасы газеті Республикалық газет 2017 жылдың 17 сәуірі күні мүмкіндігі шектеулі балалардың арасында «Жұлдызай» ХІІ шығармашылық фестивалі мен І спартакиадасы облыстық білім басқармасының ұйымдастыруымен және «Нұр Отан» партиясының Қызылорда облысындағы филиалының қолдауымен өткізілді.
«Жұлдызай» шығармашылық фестивалі мен спартакиада 10-18 жас аралығындағы мүмкіндіктері шектеулі балалар мен жасөспірімдердің әлеуметтік белсенділігін, шығармашылық мүмкіндіктерін дамыту, салауатты өмір салтын қалыптастыру бағытында қоғам, бизнес-құрылым өкілдерінің назарын аударту мақсатында ұйымдастырылды.
«Жұлдызай» І республикалық спартакиадасының іріктеу кезеңі
Өткізілетін мерзімі: 17 сәуір 2017 жыл, сағат 10-00.
Өткізілетін орны: №278 орта мектеп базасы.
Мүмкіндігі шектеулі 10-17 жас аралығындағы балаларымыз спорттың 4 түрінен (мини футбол, асық ату, жеңіл атлетика, үстел теннисі) жарысқа қатысты. Барлық 48 қатысушы облыстық білім басқармасының дипломымен және бағалы сыйлықтармен марапатталды.
«Жұлдызай» шығармашылық фестивалі
Өткізілетін мерзімі: 17 сәуір 2017 жыл, сағат 11-30
Өткізілетін орны: Қорқыт ата атындағы Қызылорда мемлекеттік университетінің студенттер сарайы.
Аудандық, қалалық іріктеу кезеңінде барлығы 320 бала өнер көрсетіп, облыстық фестивальге жолдама алған 150 бала ән айту, би билеу, әнді ым-ишаратпен айту, аспапта ойнау, қолданбалы көркем өнер, сурет-бейнелеу өнері бойынша өз өнерлерін ортаға салды.
Шығармашылық фестиваліне қатысушыларды «Бәрімізде бірдейміз» атты Қазанғап атындағы музыкалық колледж студенттері мен «Волонтеры Кызылорды» ҮЕҰ – ның бірлескен флешмобымен қарсы алды.
Шығармашылық Фестиваль «Болашақ» университетінің студенттері, №6 есту қабілеті бұзылған мектеп интернат тәрбиеленушілері, музыкалық колледждің әншілерінің ым-ишарат тілінде «Жұлдызай» Гимнді айтуымен басталды. Байқауға қатысушы өнерпаздар өз өнерлерін нақышына келтіре ән айтумен қатар би билеп, ым-ишаратпен жүректерге жеткізе өнерлерін көрсетті.
Әрбір өнерпаз балаларға «ТорғайПетролиум» АҚ, облыстық мәслихат депутаттарының сый-сыяпаттары мен облыстық білім басқармасының дипломы табысталды.
Фестиваль соңын мерекенің құрметті қонағы – Қазақстанның эстрада әншісі Нұржан Керменбаев әнімен шашу шашты.
«Жұлдызай» мүмкіндігі шектеулі балалар шығармашылығының фестивалі мен спартакиаданың облыстық іріктеу кезеңінің жеңімпаздары 1-маусым — Халықаралық балаларды қорғау күні мерекесіне орай Алматы қаласында өткізілетін шараға жолдама алды.
2015-2016 жылдар аралығындағы жетістіктер:
2015 жылы өткізілген Республикалық фестивальде №6 құлағы нашар еститін балаларға арналған мектеп-интернатының «Балауса» домбырашылар ансамблі І орын иеленді, Халықаралық «Бала — өмірдің гүлі» байқауының бас жүлдегері «Алтын диплом» иегері, Түркия қаласында өткізілген байқаудың лауреаты атанды.
2016 жылы республикалық байқауда әнді ым-ишаратпен айтуда Қуандық Еркебұлан 2-орын иеленді. №1 оңалту орталығында тәрбиеленушілер ауыр мүгедектігіне қарамастан би номинациясы бойынша ІІІ орын иеленді. №222 мектеп оқушысы Болат Ермек ІІІ орын иегері, Шиелі ауданы №148 мектеп оқушысы Жадыра Жүсіп лауреат атанды. Қызылорда облысынан әр жанр бойынша қатысқан 12 мүмкіндігі шектеулі балаларымыз үлкен жетістіктермен оралды.
«Жұлдызай» фестивалі мен спартакиадасының демеушілері:
Фестиваль «Нұр Отан» партиясы Қызылорда облыстық филиалының қолдауымен өткізілуде.
Балаларға бағалы сыйлықтарды облыстық мәслихат депутаттары: Кенжебаев Темірхан Бердәліұлы, Бекжанов Мәдіхан Әріпұлы, Махашев Бағдаулет Еркінбекұлы және «Евразия» спорт кешені және жеке кәсіпкер Ибрагим Рустемұлы ұсынды.
Басты демеушіміз – «Торғай Петролеум» АҚ.
