Білім айнасы газеті Республикалық газет 
Жаңартылған бағдарлама бойынша гуманитарлық бағыттағы пәндерді оқытудағы өзекті мәселелерді талқылау, өзара тәжірибе алмасу, құнды ақпараттар беру арқылы тәжірибедегі проблемалардың шешу жолдарын табуға әдістемелік көмек беру мақсатында «Жаңартылған білім беру мазмұнындағы жаңашыл ұстаз» тақырыбымен №152 қазақ орта мектебінде жоғарғы деңгейде аудандық семинар болып өтті.
Мектеп директоры Ержан Дүйсеновтың басшылығымен, директордың оқу жұмысы жөніндегі орынбасары Ардақ Құрманаеваның ұйымдастыруымен өткен семинарға аудандық білім бөлімінің әдіскері Халипа Сәрсенбаева, аудандық мектептердің қазақ тілі мен ағылшын тілі пәндерінің мұғалімдері қатысты.
Мектеп психологы Ж.Құрманбаеваның өткізген флеш-тренингі қонақтарды сергітіп алды. Семинар аясында аталмыш мектептің ағылшын тілі пәні мұғалімдері К.Тәжбенова мен Ж.Сапарымбетованың, қазақ тілі пәні мұғалімдері Б.Төлегенова мен Ш.Баймаханованың жаңартылған білім беру бағдарламасына сай өткізген сабақтары ойдағыдай болды. Пән мұғалімдерінің қолданған инновациялық педагогикалық әдіс-тәсілдері, кері байланыс түрлері қатысқан мұғалімдердің қызығушылығын тудырды. Аталған мұғалімдер өз сабақтарында ерекше сабақ құрылымын қолданып, АКТ – ны сәтті кіріктіріп, оқушылармен қарым-қатынаста дараланды.
Семинар аясында қонақтардың зор ықыласына бөленген, қонақтарды керемет әсерге бөлеген Б.Құрманаеваның ақындығына арналған жыр кешін айрықша атап өткім келеді. Ұстаздық, ақындық және тілшілік – үшеуін қатар алып жүрген әріптесім Ботакөз өзінің отты да рухты және сыршыл лирикасымен тыңдармандарды тәнті етті. Әсем әндер, мың бұралған билер, ақын өлеңіне жасалған бейнероликтер жыр кешінің әрін одан сайын аша түсті. Арасында әріптесімнің өлеңдерін нақышына келтіре мәнерлеп оқыған сәттеріне куә болдық.
Әсерлі поэзия кешінен соң Х.Сәрсенбаева семинарды қорытындылап, өзге мектептерден келген мұғалімдер оң пікірлерін білдіріп жатты. Жаңалыққа, жаңашылдыққа қашанда жаны құмар жөлектік әріптестеріме шығармашылық табыстар, білімнің биік шыңдарын тілеймін.
Ералиева Меруерт Бастановна
№152 қазақ орта мектебі КММ
бастауыш сынып мұғалімі
Қызылорда облысы, Шиелі ауданы, Жөлек ауылы
