Білім айнасы газеті Республикалық газет Қазанның 6-сы күні Жамбыл облысы әкімдігінің Білім басқармасының ұйымдастыруымен мұғалімдер мерекесіне орай Тараз қаласындағы «Баласағұн» мәдениет сарайында салтанатты жиын өтті.
Іс-шараға Жамбыл облысының 10 ауданының білім бөлімдеріне қарасты мекемелері мен Тараз қаласы білім бөлімінің 61 мектеп пен 45 балабақшаның өкілдері қатысты. Жамбылдық білім саласы қызметкерлері аталмыш облыс әкімінің бірінші орынбасары Орынбеков Бекболат Серікбекұлының педагогтарға арналған құттықтау сөзін тыңдады. Ол:
— Кеше Елбасы Н.Ә.Назарбаев «Қазақстандықтардың әл-ауқатының өсуі: табыс пен тұрмыс сапасын арттыру» өзінің Жолдауы арқылы педагогтарға үлкен құрмет көрсетті. «5 жыл ішінде білім, ғылым, денсаулық сақтау салаларына барлық көздерден жұмсалатын қаражатты ішкі жалпы өнімнің 10 пайызына дейін жеткізу қажет», — деп үкіметке тапсырма беруі аталған сала қызметкерлерін сөзсіз қуантты. Елбасының тапсырмасы бойынша келесі жылы «Педагог мәртебесі туралы заң» қабылданатын болды.
Біздің облысымыз білім саласында үлкен жетістіктерге жетіп отыр. Мәселен, халықаралық жарыстарда 508 педагог қызметкерлеріміз жеңімпаз атанса, республикалық «Үздік педагог» байқауында 4 ұстаз грант иегері атанды.
Ал, облыстық жас жеткіншектеріміз білім саласындағы олимпиадалардан 7 жыл қатарынан жеңімпаз атанып, 143 медальды иеленуі аймақтың мәртебесін көтеріп отыр. Бұл мұғалімдердің тынымсыз еңбегінің арқасы деп білеміз!
«Алты Алаштың ұлы бас қосқанда төрдегі орын мұғалімдікі» — деп лирик ақын М.Жұмабаев айтқандай, мұғалімнің орыны қашан да төр, еңбектеріңіз жана берсін! Осы рәсімде облыстағы білікті, тәжірибелі, ұлағатты ұстаздарымызды құттықтауға рұқсат етіңіздер, — деп Жамбыл облысы әкімінің орынбасары Б.С.Орынбеков ағынан жарылды.
Мереке кешінде аталмыш аймақтың әкімінің орынбасары «Үздік педагог» байқауының жеңімпаздарын, Ы.Алтынсарин төсбелгісінің иегерін, сонымен қатар, Жамбыл облысы әкімінің «Құрмет грамотасымен», ҚР Білім және ғылым министрлігінің төсбелгісін білікті білім саласының қызметкерлерін марапаттады. Мереке жүргізушілері педагогтарға арналған ән мен биді ұсынып, салтанатты кеш көңілді өтті.
Жансая Құрманғалиқызы,
«Білім айнасы»,
Жамбыл облысы, Тараз қаласы
