ЕҰУ-ДЕ ҚАЗАҚ ТЕЛЕВИЗИЯСЫНЫҢ 60 ЖЫЛДЫҒЫ АТАЛЫП ӨТТІ

1958 жылы 8 наурызда еліміздің Алматы қаласында алғаш рет тікелей телехабар таратылған болатын. Әр жылдары Қазақ телевизиясы сан түрлі құрылымдық өзгерістерге ұшырады.
Жуырда Л.Н. Гумилев атындағы Еуразия Ұлттық университеті Журналистика және саясаттану факультетінде сол Қазақ телевизиясының 60 жылдығына орай «Qazaqstan» — ұлы дала елінің «көзі, құлағы һәм тілі» атты салтанатты шара өтті.
Айтулы шараға телевизия саласының ардагерлері, қоғам қайраткерлері және жетекші БАҚ басшылары мен өкілдері, университеттің профессор—оқытушылар құрамы және білім алушылар қатысты.
Қазақ телевизиясы ардагерлері мен зиялы қауым өкілдері қатысқан шарада Журналистика және саясаттану факультетінде «Qazaqstan» Ұлттық телеарнасының атаулы оқу—тәжірибелік аудиториясы ашылды. Онда тұңғыш қазақ телеарнасының тарихы, қазақ телевизиясына еңбегі сіңген тұлғалар туралы мол деректер мен оқуға қажетті кітаптар қойылып, интерактивті тақтамен жабдықталған.
Бұл жерде болашақта арнада қызмет ететін кадрлар дайындалмақ. Сондай-ақ, басты арнаның эфиріндегі бағдарламалар талқыланып, жастарға жұмыстың жүргізілу жолы мен мақсаты түсіндіріледі. Корпорацияның белді, жетекші мамандары аталмыш факультет студенттеріне шеберлік сағаттарын өткізеді. Дәрістің тақырыптары оқу бағдарламасы мен студенттердің сұранысына сәйкес анықталып отырады.
«Өткен ғасырдың ІІ жартысында адамзат тарихы мен оның келешегіне әсер еткен үш жаңалық болды: ғарышты игеру, атомды меңгеру және телевизия еді. Міне, осыдан-ақ телевизияның адам өмірі мен қоғамдағы орнын бағамдауға болады. Әкем көп жыл Семей телерадио комитетін басқарды. Сондықтан, телевизия саласы мен үшін ыстық. Баршаңызды салтанатты мерекемен құттықтаймын! Жаңа дәрісхана келешекте жақсы мамандарды тәрбиелеуге өз үлесін қосады деп сенемін. Қазақ телевизиясы — Ұлы дала еліндегі қарашаңырақтардың бірі, елдік мұраттардың жаршысы, рухани және мәдени құндылықтарымыздың ту ұстаушысы. Осыдан 60 жыл бұрын алғаш рет көрерменіне жол тартқан телеарнаның көзі тірі куәгерлері ортамызда. Телеарна басшылығында болған, түрлі қызметтер атқарған тұлғаларды еліміз жақсы біледі, құрметтеп, қадірлейді. Ашылып жатқан аудитория сол шежірелі тарихтың айнасы, жас журналистерді шыңдаудың шеберханасына айналады деген сенімдеміз», — деді Л.Н. Гумилев атындағы Еуразия ұлттық университетінің ректоры, ҚР ҰҒА академигі Ерлан Сыдықов сахна төрінде.
«Теориялық білімді тәжірибемен ұштастыру деген осы. Мұнда«Қазақстан» телерадиокорпорациясының өнімдері студенттерге таныстырылып, тәжірибе жинақтауына мүмкіндік береді. Сондай-ақ, мол мағлұматтар жиналумен қоса, алдағы күндері «Qazaqstan» телеарнасы танымал журналистерінің қатысуымен «Журналистика» мамандығы студенттеріне теориялық және тәжірибелік сабақтарға негізделген шеберлік сыныптардың жүйелі түрде өтіп тұруы көзделуде. Қос LED экран, интерактивті тақта, компьютер сынды тиісті техникалармен жабдықталып, шеберліктерін шыңдайтын жағдай жасалған. Сонымен қатар интернетке қосылып, тікелей телеөнімдермен танысуға, байланысқа шығуға болады», — деді Журналистика және саясаттану факультетінің деканы, алаштанушы ғалым Қайрат Сақ.
Бүгінде 3 телеарна мен 4 радионы біріктіріп отырған «Qazaqstan» РТРК» АҚ рухани жаңғыру бағытында ауқымды іс-шараларды жүзеге асыруда. Жаңа сипаттағы бағдарламалар эфирге шығып, деректі және сериалды фильмдер түсірілуде. Корпорация басшылығы журналистердің кәсіби біліктілігін шыңдауына, жаңа буын мамандарын даярлауға көңіл бөліп келеді, білім алушылардың өндірісте тәжірибеден өтуіне қамқорлық танытуда.
Сондай-ақ, шара барысында «Хабар» агенттігінің белді қызметкерлері Журналистика және саясаттану факультетінде шеберлік дәрісін өткізді.

«Бұл шараның басты мақсаты – жас мамандарға «Хабар» агенттігі тарапынан шығармашылық қолдау жасау. Осы жас журналистердің біразы болашақта біздің агенттіктің қызметкерлері болатындығына сенімдіміз. «Хабар» агенттігі биылғы қазақ телевизиясының 60 жылдығына арнап бірнеше шара жоспарлаған. Соның бірі – бүгін өтіп жатқан «Хабардэй» шеберлік сағаты», — деді құрамына 4 бірдей республикалық арнаны біріктірген «Хабар» агенттігі АҚ басқарма төрайымының орынбасары Ринат Кертаев.
Шеберлік дәрісіне агенттіктің құрамына кіретін 4 арнаның бірқатар белді қызметкері қатысты. Ерлан Игісінов, Саят Жөкенұлы, Лаура Жақыпова, Өркен Кенжебек, Нұрсұлтан Құрман сынды журналистер толымды тәжірибелерін ортаға салып, студенттер таратыпанан қойылған сауалдарға жауап берді. Мәселен, «Хабар» арнасының директоры Ерлан Игісінов сала жұмысының ерекшеліктерін түсіндіріп, сұхбат алуға қатысты өзіндік құпияларымен бөлісті.
Ресми шара ЕҰУ Журналистика және саясаттану факультеті студенттерінің концерттік бағдарламасына ұласты.
  

 Гүлжазира ҚҰДАЙБЕРГЕНҚЫЗЫ,
Астана