Білімнің қара шаңырағына – 80 жыл!

Еліміздің іргелі оқу орындарының бірі — М. Қозыбаев атындағы Солтүстік Қазақстан мемлекеттік университеті. Аталмыш университет 80 жылдық мерейтойын атап өтті. Өңірімізге тиесілі оқу орны 80 жылда талай-талай жетістікке жетіп, ғылым мен білімнің биігінен көріне білді.

Университет тарихы алғаш аймақтағы білім беру жүйесін, одан әрі дамыту міндеттерінің алғышарты болып табылған Қазақ КСР кеңестік халық комиссариятының 1937 жылдың 19 наурызындағы жарлығы негізінде Петропавл мұғалімдер институты болып ашылады. Қазақ КСР Халық ағарту комиссариятының 1937 жылдың 25 шілдесіндегі № 835 бұйрығына сәйкес, 1937 жылдың 1 қыркүйегінде өз жұмысын жаратылыстану-жағрапия және тарих факультеттері арқылы бастаған қара шаңырақ бүгінде 80 жылды еңсеріпті.

М.Қозыбаев атындағы Солтүстік Қазақстан мемлекеттік университеті ректоры Өмірбаев Серік Мәуленұлы өз әріптестерін құттықтап, жемісті жылдар ішінде жеткен көптеген жетістіктерін жіпке тізгендей етіп баяндап берді. Университеттің мақтанышы болатын түлектерді де атап кетті. Бүгінгі таңда вице-минстр қызметін атқарып келе жатқан Асланбек Амрин, көк туымызды желбіретіп жүрген велоспортының шебері Александр Винокуров сияқты ел мақтанышына айналған түлектерімен мақтанатынын жеткізді.

Осындай телегей теңіз жетістігі бар оқуы ордасына Қазақстан Республикасының білім және ғылым минстрі Ерлан Кенжеғалиұлы Сағадиев келіп құттықтап, университеттің профессорлық-оқытушылық құрамының бірқатарына әртүрлі дәрежедегі төсбелгіні табыстады. Атап айтар болсақ, «Еңбек ардагері» медалімен «Көлік және машина жасау» кафедрасының аға оқытушысы Серік Ысқақұлы Әбілмәжінов, т.ғ.к, профессор Томашец Анатолий Константинович, э.ғ.д., профессор Кендюх Иван Гавриилович марапатталса, «Ы.Алтынсарин» атындағы төсбелгімен х.ғ.д., профессор Бақыт Естекенқызы Бегенова және ф-м.ғ.к., профессор Гусаков Виктор Петрович марапатталды. Ал, «Қазақстан Республикасының ғылымының дамуына сіңірген еңбегі үшін» төсбелгісімен белгілі абайтанушы, абылайтанушы, журналист, ф.ғ.к., профессор Зарқын Сыздықұлы Тайшыбай марапатталды.

Солтүстік Қазақстан облысының әкімі Құмар Іргебайұлы Ақсақаловта Теріскейдегі қара шаңырақты 80 жылдық мерейтойымен құттықтап, бірқатар қызметкерлерге облыс әкімінің құрмет грамотасын табыстады.

Әл-Фараби атындағы Қазақ ұлттық университетінің ректоры Ғалымқайыр Мұтанұлы Мұтанов, «Тұран» университетінің ректоры Рахман Алшанұлы Алшановта 80 жылдық тарихы бар ұжымды құттықтап, алып келген марапаттарын табыстады.   Еліміздегі барлық жоғары оқу орындарынан келген құттықтау хаттар оқылып, соңы мерекелік концертке ұласты.

Көкбас Жазира

Білім айнасы

Петропавл қаласы