Болашаққа бағдар балабақшадан басталады

  Ақпан айының 14-жұлдызында Алматы қаласы, Жетісу аудандық ҚМҚК «№170 бөбекжай-балабақшасында» балаларды ерте бастан жетілдіру және олардың өзіндік қабілеттерін танытуға баулу мәселесін қарастырған аудандық семинар болып өтті. Жиынға қонақ ретінде Алматы қаласы Жетісу ауданы Білім бөлімінің басшысы Кусаинова Салтанат Амангельдиевна, Жетісу ауданы Білім бөлімінің бас маманы Асель Қазыбекқызы, Қоғамдық-саяси «Алматы ақшамы» газетінің тілшісі Рая Ескендір, Жетісу аудандық әдіскерлер бірлестігі және ҚМКҚ «№170 бөбекжай-балабақшасының» педұжымы қатысты.
Қонақтарды балабақша өмірімен таныстырған алғы сөзінде аталмыш мекеме   меңгерушісі Т.О. Сабырова: «Балаларды жүйелі сөйлей білуге, шығармашылық қабілеттерін таныта білуге үйрету, оларды балабақша жасынан өмірге бейімдеу тәрбиешілер алдында тұрған маңызды міндеттердің бірі», — дей отырып, семинардың қатысушыларға берері мол болатынына сенімді екенін айтты. Артынша тәрбиеші Ташимова А. бастаған ересектер тобы семинардың ашылу рәсімін жасады. Келушілерге тамаша көңіл-күй мен жаңа әсерлер сыйлай алған семинар одан әрі тәрбиеші Қ.Сүйіндіктің «Қызғалдақ» тобы қоятын «Қазақтың» мақтанышы қойылымына ұласып, бүлдіршіндердің қонақтар алдында өз өнерлерін паш етуіне жол ашты. Аталмыш драмалық бағдарламаның   мақсаты балалардың театр ойындарына оң көзқарасын қалыптастыру және өзін-өзі көрсетуде жеке шығармашылық қабілеттерін танытуға үйрету екен.
Семинардың сыйлықтары  мұнымен аяқталып қалған жоқ. Тәрбиеші Г.Торғаеваның жетекшілігіндегі мектепалды даярлық сыныбы «Маржан мен көкөністер» сахналық қойылымынан үзінді  қойып семинардың көрігін қыздыра түсті. Бұдан кейін кішігірім концерттік бағдарлама беріліп, жиын қонақтарын бір сергітіп тастады. Семинар соңындағы пікір алмасу сәтінде аудандық білім бөлімінің басшысы К.С. Амангельдиевна: «Осы тектес семинарлар жас ұрпағымызды өмірге баулу жұмысында үлкен септігін тигізеді. Себебі, болашаққа бағдар балабақшадан басталады. Аудандық Білім бөлімінің жұмыс жоспарына сай ұйымдастырылып отырған бүгінгі семинар тәрбиешілердің де тәжірибе жинауына біршама көмектесті деген ойдамын»,- дей отырып ұйымдастырушыларға өз алғысын білдірді.

Дінмұхамед Мұхаметжан