Астананың 20 – жылдығына арналған «Болашақ келбеті» көрмесінің салтанатты ашылу

2018 жылғы 27 маусымда, сағ. 17.00-де Қазақстан Республикасының Тұңғыш Президенті – Елбасы кітапханасы музейінің ғимаратында Астананың 20 жылдығына арналған «Болашақ келбеті» көрмесінің ашылу салтанаты өтеді. Көрме Қазақстан Республикасы Президентінің архивімен бірлесіп ұйымдастырылмақ.

Көрменің елорда тарихына тікелей қатысы бар мемориалдық ғимарат, Астанадағы Мемлекет басшысының алғашқы резиденциясында орналасуының  айрықша мәні бар. Дәл осы жерде Астана құрылысының Бас жоспары қабылданып қана қоймай, елордаға арналған әйгілі «Еуразия жүрегінде»  атты Елбасының кітабы жазылып, ҚР Парламенті мен Үкіметінің бірлескен отырысында Ақмола еліміздің жаңа астанасы деп жарияланды.«Болашақ келбеті» көрмесінде Астана гүлденуінің 20 жылдық тарихынан сыр шертетін бірегей архивтік құжаттар кешені ұсынылады. Астана дамуы мен құрылысына арналған кездесулерде, бас қаладағы жаңа нысандардың ашылу рәсімінде, елордаға арналған салтанатты жиындарда сөйлеген Қазақстан Республикасының Президенті Н. Назарбаевтың сөздері, астананы көшіру мәселесі бойынша ой түрткен жазба кітапшалары, іс-шаралардағы фотосуреттері – бәрі де  дереккөздер мен маңызды құжаттар қатарында ұсынулы. Көрмеде қаланың тарихымен тікелей байланысы бар музей жинағының жәдігерлері қойылады. ЭКСПО-2017 халықаралық мамандандырылған көрмесі аясында елімізге сапармен келген шетелдік меймандардың Мемлекет басшысына тарту еткен естелік сыйлықтары мен кәдесыйлары ерекше қызығушылыққа ие болмақ. Осы тұста ЭКСПО-2017 тақырыбына көрменің жеке бір бөлігі арналатынын айта кеткен жөн. Жұртшылық назарына «КаZaхи» командасының Елбасыға тарту еткен КВН-2017 жазғы кубогы, басқа да құнды жәдігерлер ұсынылады.Көрмені дайындау барысында жүргізілген жинақтау жұмыстары көрме материалдары арқылы өз нәтижесін көрсетті. Атап айтқанда, алғаш рет «Казахстанская правда» газетінің фотоархивінің бірегей фотосуреттері, сондай-ақ Елбасы кітапханасы музейінің қорына берілген «Қазпошта» АҚ-ның мөртаңбалар жиынтығы ұсынылады.Көрменің ашылу салтанатына келген қонақтарға арнайы бағдарлама әзірленіп отыр. Оның аясында елорда мерейтойына арналған ҚР Президенттік Оркестрінің шағын концерті, Елбасы кітапханасы музейінің экспозициялары бойынша танымдық экскурсия өтеді.«Болашақ келбеті» көрмесінің материалдарымен танысқан көрермен 20 жылға «қайта оралып», елорданы көшірілуі мен құрылысына қатысқан азаматтардың көзімен көре алады.

«Болашақ келбеті» көрмесі 2018 жылғы 12 тамызға дейін жалғасады

Астана қаласы, Бейбітшілік, 11.