Адамгершілік біздің басты міндетіміз

Бала бойында білім нәрін себетін, адамгершілік дәнін егетін басты тұлға – ұстаз. Адам жанын нұрландырар ұғымының ұлысы – ұстаз. Елбасымыз Н.Назарбаев халқымыздың болашағы туралы тереңнен толғай, «Мемлекетіміздің ең басты дүниесі тек қана табиғи байлық емес, сонымен қатар жасөспірім ұрпағы, өйткені олар – біздің ұлтымыздың болашақ айнасы» дегені мәлім. Олай болса, Жас ұрпаққа білім мен тәрбие беретін ұстаз-баға жетпес биік тұлға. Ұстаздық ұлы қасиет. Ұстаз білім нәрімен сусындаған жан. Абай атамыз «Сен де бір кірпіш дүниеге, кетігін тап та бар қалан» деп айтқандай әр оқушыға білім беріп, оған өмірлік бағыт сілтеп өмірге «кірпіш» болып қалануына зор үлес қосушы – мұғалім. Білімді, тәртіпті, тәрбиелі, инабатты жаны таза рухы биік, Отаншыл адамды, тұлғаны қалыптастырып, баптайтын адамның өзі де қандай болуы керек, ол кім? Әрине ол «ұлы»деген сөзбен тіркесіп келетін ұстаз, мұғалім. Елбасымыз Н.Ә.Назарбаев «Еліміздің ертеңі бүгінгі жас ұрпақтың тағдыры ұстаздың қолында» – деп атап көрсеткендей, ұрпақ тағдыры үшін жауап беру ұстаз атаулыға үлкен салмақ тастап отыр. Сондықтан біздер ұстаздар, күнделікті өмірдің жай ғана адамы емес, болашақты құрушыларды, адамзаттың сәулетті болашағын жасаушыларды тәрбиелеп отырғанымызды ұмытпауымыз керек. Мамандықтың бәрі жақсы десек те, ұстаз орны ерекше. Әрине, бәрі емес, бала жанымен біте қайнасқандары ғана. Ұстаздықты бар ұлағаттың басы деп білетіндердің ғана орны – мектеп. Ұлтымызда бала тәрбиесіне қатысты сөз сөйлеген кезде, «Баланы бастан» деген ұғымның астарында жатқан ойды көпшілігіміз түсіне бермеуіміз мүмкін. Өйткені бұл ең әуелі ұлттық тәрбиеге келіп тіреліп, оның пайда болуынан бастау алады. Ұлы жазушы М Әуезовтың «Ел боламын десең – бесігіңді түзе» деген қағидасы бүгінгі күні ел ұранына айналды десек қателеспейміз. Бесіктегі бала нені ұғар дейсің деген қатаң пікірден шыға алмай жататын кейбір отбасыларға айтарымыз, баланың бесікте ғана емес,тіпті ана құрсағында жатып та қоршаған ортадағы құбылыстарды сезіп, ұғатыны бүгінгі таңда дәлелденген құбылыс. Балаларымызды имандылыққа тәрбиелеу үшін олардың ар-ұятын, намысын оятып, мейрімділік, қамқорлық, кішіпейілділік, қамқорлық көрсету, адалдық, ізеттілік сияқты қасиеттерді бойына сіңіру қажет. Баланы үлкенді сыйлауға, кішіге ізет көрсетуге, иманды болуға, адамгершілікке баулу – адамгершілік тәрбиенің жемісі. Адамгершілік тақырыбы мәңгілік. Ол ешқашан ескірмек емес. Жас ұрпақтың бойына адамгершілік қасиеттерді сіңіру ата-ана мен ұстаздардаң басты міндеті.

Қарағұлова Құндыз Құдайбергенқызы,
№1 Т.Әлиев атындағы орта мектептің бастауыш сынып мұғалімі,
Маңғыстау облысы, Жаңаөзен қаласы